Усы жылдың 2-апрель күни Нөкис районындағы балалар ҳәм жас өспиримлер спорт мектеби майданшасында «Жас өрт өшириўши» спорт жарысының районлық басқышы болып өтти. Бул ҳаққында Нөкис районлық Өрт қәўипсизлиги бөлимшеси баслығы, капитан Н.Нурекеев хабар берди.
Спорт жарысына райондағы улыўма билим бериў мектеплеринен сайланды командаларда жәми 42 оқыўшы қатнасты.
Жарыс командалық түрде турникке тартыныў, 100 метр аралыққа, сондай-ақ, 1000 метр аралыққа жуўырыў сыяқлы 3 турдан ибарат болды.
Жарыс жуўмағына муўапық, командалық есапта райондағы 1-санлы улыўма билим бериў мектеби жеңимпаз деп табылған болса, 9-санлы ҳәм 7-санлы улыўма билим бериў мектеплери сәйкес түрде 2- ҳәм 3-орынларды ийеледи.
Жарыс жеңимпазларына Нөкис районлық Өрт қәўипсизлиги бөлимшеси, Жаслар аўқамы районлық Кеңеси ҳәм районлық Халық билимлендириў бөлими тәрепинен таярланған саўғалар тапсырылды.
Ислам Матеков,
Қарақалпақстан хабар агентлигиниң шолыўшысы.