«Өзим оқыған мектебиме мениң китап саўғам» акциясын қоллап-қуўатлаған бир топар жазыўшы-шайырлар өзлери билим алған мектеплерде болып, саўғалар тапсырды.
Атап айтқанда, Қарақалпақстан Жазыўшылар аўқамының баслығы, Қарақалпақстан халық шайыры Кеңесбай Каримов Шымбай районы Халық билимлендириў бөлимине қараслы 7-санлы улыўма билим бериў мектебинде мийманда болды.
Усы мүнәсибет пенен өткерилген илажда атап өтилгениндей, жақында 19-март күни болып өткен видеоселектор мәжилисиндеги Президентимиз Ш.Мирзиёевтиң жаслар арасында китапқумарлықты үгит-нәсиятлаў, олардың китап оқыўға болған қызығыўшылығын арттырыў бойынша басламасы республикамыздың зыялылары тәрепинен ҳәр тәреплеме қоллап-қуўатланбақта. Себеби, келешегимиз болған жас әўладты ҳәр тәреплеме билимли, жетик инсанлар етип тәрбиялаўда китаптың тутатуғын орны айрықша. Ушырасыўда Қарақалпақстан Жазыўшылар аўқамының баслығы мектеп китапханасына 25 атамадағы 100 данадан зыят китап саўға етти.
Сондай-ақ, «Тынышлық сақшысы» газетасының бас редакторы, шайыр Жуманияз Өтениязов ҳәм «Қарлығаш» журналының бас редакторы, жазыўшы Бекназар Ерназаров Тахтакөпир районы Халық билимлендириў бөлимине қараслы 11-санлы улыўма билим бериў мектебинде жас китапқумарлар менен ушырасты. Елимизде Президентимиздиң басшылығында китап оқыйтуғын балаларды қоллап-қуўатлаў ҳәм оларды хошаметлеў бойынша алып барылып атырған кең көлемли илажларға тоқтап өтти. Китапты көп оқыў арқалы келешекте қәлеген кәсиптиң маманы болып шығыў мүмкин. Илаж соңында мийманлар тәрепинен мектеп китапханасына 25 атамадағы 100 данадан зыят әдебий китап саўға етилди.
Усындай илаж Қараөзек районы Халық билимлендириў бөлимине қараслы 1-санлы улыўма билим бериў мектебинде де болып өтти. Онда Қарақалпақстан Жазыўшылар аўқамының баслығы, Қарақалпақстан халық шайыры Кеңесбай Каримов ҳәм Қарақалпақстан халық жазыўшысы Алланазар Абдиев шығып сөйлеп, мектеп оқыўшыларын көбирек китап оқыўға, оның менен жақын дос болыўға шақырды. Ушырасыў соңында мектеп жәмәәтине түрли атамадағы китаплар саўғаға тапсырылды.
«Өзим оқыған мектебиме мениң китап саўғам» акциясы шеңбериндеги бундай илажлар республикамыз бойлап даўам етпекте.
Д.АБИБУЛЛАЕВ,
Қарақалпақстан хабар агентлигиниң шолыўшысы.