Кеше Франция пайтахты Париж қаласында жазғы Олимпиада ойынларында футбол бойынша жарыс басланып кетти.
Атап айтқанда, быйылғы жылы мәмлекетимиз тарийхында туңғыш мәрте Олимпиада ойынларына қатнасып атырған Өзбекстан U-23 сайланды командасы Испанияга қарсы өзиниң биринши ойынын өткерди.
Ушырасыў еки команданың да ҳүжимлери менен басланып, онда Тимур Кападзе шәкиртлериниң шөлкемлестирген ҳүжимлери қәўиплирек көринди. Бирақ, тилекке қарсы сайланды командамызға бул ойында биринши болып гол урыў несип етпеди. Керисинше, испанлар ушырасыўдың 28-минутында жәрийма майданшасына жеткерилип берилген топты Пубилл Өзбекстан сайланды командасы дәрўазасына анық жоллаўға еристи.
Биринши таймның ақырына келип, Испания сайланды командасының қорғаўшысы Пау Кубарси 5-номердеги ойыншымыз Муҳаммадқодир Ҳамралиевти қопаллық пенен тоқтатып қалды ҳәм VAR арқалы бул эпизодты көрип шыққан бас төреши Испания дәрўазасы тәрепке пенальти белгиледи.
Бул пенальтиди анық әмелге асырған командамыз сәрдары Элдар Шамурадов Өзбекстан сайлнады команадсының Олимпиада ойынларындағы дәслепки голын урыўға миясар болды.
Екинши таймда испанлар қурамында бир неше өзгерислер жүз берди ҳәм бул ойынға өзиниң унамлы тәсирин көрсетти. Командамыз дәрўазасына шөлкемлестирилген усындай ҳүжимлердиң биринде Аббосбек Файзуллаев жәрийма майданшасы ишинде қарсылас футболшының аяғына соққы берип алды ҳәм буның ушын дәрўазамызға пенальти белгиленди.
Серхио Гомес тәрепинен тебилген пенальтиди болса, Абдувоҳид Неъматов өзиниң аяқлары менен қайтарып қалыўға еристи.
Буннан кейин де испанлар бир қатар ҳүжимлер шөлкемлестирди ҳәм олардың бирин 62-минутта пенальтиден пайдалана алмаған Серхио Гомес анық әмелге асырды.
Бул голдан соң Тимур Кападзе шәкиртлери бир қатар қәўипли ҳүжимлер шөлкемлестиргени менен, оларды голға айландыра алмады.
Солай етип елимиздиң сайланды командасы 1-турда Испанияға 1:2 есабында жеңилип қалды.
Ал, усы топардағы екинши ойында болса, египетли футболшылар Доминикан сайланды команадасы менен ушырасты ҳәм бул ойын 0:0 есабы менен жуўмақланды.
Енди командамыз ағзалары 27-июль күни 2-турда египетли футболшылар менен ойын өткереди.
Сондай-ақ, бул турда Франция сайланды командасы АҚШлы футболшылар менен ушырасып, 3:0 есабында жеңиске еристи.
Адилбай Оразов,
Қарақалпақстан хабар агентлиги шолыўшысы.