Шымбай районында 2-сектор баслығы Расул Халмуратовтың басламасы менен аймақ жасларының бос ўақытларын мазмунлы өткериўи ушын ҳәр түрли спорт ҳәм басқа да мәдений илажлар өткерилип келинбекте.
Атап айтқанда, усы жылдың басынан берли спорттың футбол, шахмат-шашка, киберспорт, баскетбол, волейбол ҳәм стол тенниси түрлери бойынша жарыслар «Билим ринг», «Заковат» интелектуаллық ойынлары, тарийх ҳәм ҳуқықтаныў пәнлеринен «Пәнлер олимпиадасы» өткерилип, бул илажларға 2000 нан аслам жаслар қамтып алынды.
Жақында сектор аймағындағы жаслар арасында спорттың баскетбол ҳәм түрлеринен «Прокурор кубоги» жарысы болып өтти.
Оған 12 команда қатнасып, баскетбол бойынша өткерилген жарысларда 1-орынды Көнши, 2-орынды Қаракөл ҳәм 3-орынды Темир жол гүзары мәкан пуқаралар жыйынлары жаслары ийелеўге миясар болды.
Ал, волейбол бойынша өткерилген беллесиўлер жуўмағында, 1-орынды Темир жол гүзары, 2-орынды Гүлистан ҳәм 3-орынды Көнши елатларының жаслары жеңип алыўға еристи.
Жарыс соңында жеңимпаз жасларға район прокуратурасы тәрепинен таярланған арнаўлы кубок, диплом ҳәм естелик саўғалар тапсырылды.
Бул бағдардағы илажлар районда даўам етпекте.
Адилбай Оразов,
Қарақалпақстан хабар агентлиги шолыўшысы