Кегейли районындағы «Жүзим бағ» аўыл пуқаралар жыйыны аймағында «Биз Президент палўанларымыз» сүрени астында белгили палўан Тәңирберген Турымбетовтың естелигине бағышланған жарыс болып өтти.
2009-2010-жыллары туўылған жас өспиримлер ҳәм қызлар арасында өткерилген жарыс алдынан белгили палўанлар, Хожели районынан Алламберген Сатаев, Нөкис қаласынан Асаматдин Қабулов, Султан Сулайманов, Өзбекстан кураш федерациясы Қарақалпақстан бөлиминиң атқарыўшы директоры С.Жүсипбеков, районлық балалар ҳәм жас өспиримлер спорт мектеби директорының орынбасары С.Қалжанов елимизде Президентимиздиң басшылығында спортты, соның ишинде, миллий кураш түрин раўажландырыўға қаратылып атырған айрықша итибарға тоқтап өтти. Соның менен бирге, белгили палўан Тәңирберген Турымбетовтың өмир жолы, гүресте ерискен жетискенликлери туўралы жасларға айтып берди.
Буннан кейин жети салмақ категориясы бойынша жеңимпазлар анықланып, оларға Өзбекстан кураш федерациясы Қарақалпақстан бөлими, районлық балалар ҳәм жас өспиримлер спорт мектеби тәрепинен диплом ҳәм баҳалы саўғалар тапсырылды.
Жулдыз ҚЫДЫРБАЕВА,
Өзбекстан мәмлекетлик дене тәрбия ҳәм спорт университети Нөкис филиалының студенти
Қарақалпақстан хабар агентлиги