Президент Шавкат Мирзиёев 2-сентябрь күни Ислам Кәримов атындағы илимий-ағартыўшылық естелик комплексине барып, Өзбекстанның Биринши Президентиниң естелигине гүлшеңбер қойды, оның жарқын естелигине ҳүрмет билдирди.
Жетик сиясий ҳәм жәмийетлик ғайраткер Ислам Кәримов 2016-жыл 2-сентябрь күни қайтыс болған еди. Мәмлекетимиз басшысы Шавкат Мирзиёевтиң қарарына муўапық бул сәне ҳәр жылы Еслеў күни сыпатында белгиленбекте.
Елимиздиң ғәрезсизликке ерисиўи ҳәм раўажланыўы жолында үлкен табысларды қолға киргизиўинде Биринши Президентимиздиң беккем ерк-ықрары, күш-жигери ҳәм теңи-тайы жоқ мәртлиги оғада үлкен әҳмийетке ийе екенлигин айрықша атап өтиў керек.
Биринши Президентимиздиң мәмлекетимизди ҳәзирги раўажланыў дәрежесине көтериў жолындағы үлкен хызметлерин халқымыз бәрқулла есинде сақлайды ҳәм оның атын барлық ўақытта айрықша ардақлап ҳәм қанаатланыўшылық пенен тилге алады.
Шавкат Мирзиёевтиң бир неше мәрте атап өткениндей, Ислам Кәримовтың естелигин қаншелли көп ҳүрметлесек, халқымыздың, әсиресе, жасларымыздың мәнаўиятын соншелли байытқан боламыз.
Бул мәресим де Ислам Кәримовтың естелигине мәмлекетимиз ҳәм жәмийетшилигимиз тәрепинен көрсетилген ҳүрмет-итибардың және бир көриниси болмақта.
Дәстүрге бола қуран оқылды. Биринши Президентимиздиң өмир жолы ҳәм көп қырлы мийнети, арзыў-тилеклери, мәмлекетлик ҳәм жәмийетлик қурылыс бағдарындағы ийгиликли мақсетлери, мәмлекетимизде тынышлықты тәмийинлеў жолындағы уллы хызметлери еске алынды.
Гүл қойыў мәресиминде парламент ҳәм ҳүкимет ағзалары, илим ҳәм мәденият ғайраткерлери, зыялылар, жаслар, кең жәмийетшиликтиң ўәкиллери қатнасты.
ӨзА