Өзбекстан Республикасы Президенти Шавкат Мирзиёев Германия Федерал Президенти Франк-Вальтер Штайнмайердиң мирәт етиўине бола усы жылы 2-3-май күнлери сапар менен усы мәмлекетте болады.
Сапар бағдарламасында Берлин қаласында Федераль Президент Франк-Вальтер Штайнмайер ҳәм Федерал Канцлер Олаф Шольц пенен еки тәреплеме ушырасыўлар өткериў нәзерде тутылған.
Өзбекстан ҳәм Германия арасындағы көп тәреплеме қатнасықларды және де беккемлеўдиң әҳмийетли мәселелери көрип шығылады, халықаралық күн тәртибиниң ҳәр қыйлы тәреплери бойынша пикир алысылады.
Германияның жетекши компаниялары менен инновациялық-технологиялық шерикликти кеңейтиўге қаратылған перспективалы жойбарлар менен бағдарламаларды әмелге асырыўға айрықша итибар қаратылады. Усы мақсетте мәмлекетимиз басшысы усы мәмлекет бизнесиниң жетекшилери менен өз алдына ушырасыў өткереди.
Сапар ўақтында Жеймс Симонс галереясында «Өзбекстанның археологиялық ғәзийнелери. Македониялы Искендерден Кушанлар империясына шекем» атамасындағы көргизбениң ашылыўы да режелестирилген.
ӨзА