Усы жылдың 17-19-февраль күнлери Сурхандәрья ўәлаятының Термиз қаласында таэквондо спорт түри бойынша өткерилген Өзбекстан чемпионатында Әжинияз атындағы Нөкис мәмлекетлик педагогикалық институтының студент жаслары да белсене қатнасты. Үлкен жастағылар, жаслар ҳәм жас өспиримлер арасында өткерилген бул чемпионатта 2 студент медал менен сыйлықланды.
Атап айтқанда, дене мәденияты факультети 3-курс студенти Султан Бердимуратов 52 килограмм салмақ категориясында 2-орынды ийелеп, гүмис медал менен ал, мектепке шекемги тәлим факультети дефектология тәлим бағдарының 2-курс студенти Серик Жақсылықбаев 92 килограмм салмақта 3-орын жеңимпазы болып, бронза медал менен сыйлықланды.
Ҳәзирги ўақытта спортшыларымыз март айында Ташкент қаласында болып өтетуғын Азия чемпионатына қызғын таярлық көрмекте.
-Бүгинги күнге шекем бир қанша шәкиртлер таярладым. Усы чемпионатта шәкиртим Ирода Жиемуратова еки алтын медал менен сыйлықланды ҳәм Азия чемпионатына жоллама алды. Өзим де бул чемпионатта жақсы нәтийже көрсете алдым. Шәкиртим менен бирге кейинги жарыста да чемпион болыўды мақсет еткенбиз- дейди Султан Бердимуратов.
Гулчеҳра Айтмуратова,
Бердақ атындағы ҚМУ студенти.
Қарақалпақстан хабар агентлиги