Усы жылдың 15-ноябринен 15-декабрь аралығында өткерилип атырған «Өрт қәўипсизлиги айлығы» шеңберинде Қарақалпақстан Республикасы Айрықша жағдайлар басқармасы хызметкерлери тәрепинен пүткил республикамыз халқын қыс мәўсиминде ҳәр қыйлы кеўилсиз жағдайлардан қорғаўға қаратылған үгит-нәсият жумыслары, оқыў-тактикалық шынығыўлар, өрт қәўипсизлиги бойынша үйрениў илажлары өткерилмекте.
Жақында Қоңырат районы «Қырқ қыз» посёлкалық пуқаралар жыйынында жайласқан «Uz-КorGaz Сhеmiсal» газ-химия комплексинде усындай оқыў-тактикалық илаж болып өтти.
Тийкарынан айрықша қорғалатуғын ири кәрханада пуқаралардың қәўипсизлигин тәмийинлеў, жүз бериўи мүмкин болған өрт жағдайларының алдын алыў мақсетинде өткерилген илажда өрт қәўипсизлиги бойынша таярлық жағдайлары, өрт өшириў үскенелериниң сазлығы тексерилди. Сондай-ақ, электр энергиясынан пайдаланыўда қәўипсизликти тәмийинлеў, ҳаўа айланысы системаларын тексериў, өрт келип шыққанда хызметкерлерди эвакуациялаў жоллары бойынша мағлыўмат берилди.
Өртти сапластырыўда зәрүр болған гидрантлардың жағдайларын тәжирийбели қәнигелер көзден өткерди.
Хызметкерлер ушын қурылған көп қабатлы квартираларда, турақ жайларда өрт қәўипсизлиги қағыйдаларының қаншелли дәрежеде дурыс жолға қойылғанлығы тексерилип, жылытыў үскенелериниң, қазанхананың сазлығы тәмийинленди.
Сондай-ақ, Айрықша жағдайлар басқармасы тәрепинен көргизбе шөлкемлестирилип, онда қатнасқан 31-санлы улыўма орта билим бериў мектеби оқыўшылары өрт қәўипсизлиги бойынша билимин арттырды.
Буннан соң «Ел абат» посёлкалық пуқаралар жыйыны аймағындағы Қоңырат сода заводы қоспа кәрханасында усындай шынығыўлар өткерилди. Илаж даўамында өрт қәўипсизлигиниң алдын алыў, жумыс ислеп атырған хызметкерлердиң өрт қәўипсизлиги бойынша ийелеген билимлерин сынақтан өткерип, түсиник жумыслары алып барылды. Сондай-ақ, тез алысатуғын буйымларды жумыс орнында сақламаў, жасалма ысытыў үскенелерин қолланбаў бойынша хызметкерлер арасында үгит-нәсият жумыслары алып барылды.
Өрт қәўипсизлиги айлығы Қоңырат районындағы мәкеме-кәрханаларда, пуқаралардың турақ жайларында даўам еттириледи.
И.Йулдошев,
«Uz-КorGaz Сhеmiсal» ЖШЖҚҚ ҳәм оның қурамындағы объектлерде өрт қәўипсизлигин тәмийинлеўди шөлкемлестириў бөлими өрт қадағалаў ҳәм профилактика бойынша инспекторы, лейтенант.
Қарақалпақстан хабар агентлиги