Давлат хизматлари агентлиги матбуот хизматининг хабар беришича, давлат хизматлари марказларига ташриф буюрувчи фуқароларимиз фикрларини инобатга олган ҳолда эски ҳайдовчилик гувоҳномасини алмаштириш муддати 3 ойдан 1 йилгача узайтирилди.
Хабарда қайд этилишича, 2021 йил 17 ноябрда “Миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналарини жорий этиш чора-тадбирлари тўғрисида тўғрисида”ги Ҳукумат қарорига ўзгартиришлар киритилди.
Унга мувофиқ, эски ҳайдовчилик гувоҳномалари қуйидаги муддатларда янгисига мажбурий алмаштирилиши белгиланди:
2010 йилгача берилганлари – 2022 йил 31 мартгача, 2010 – 2012-йилларда берилганлари – 2022 йил 30 июнгача, 2013 – 2015 йилларда берилганлари – 2022 йил 30 сентябргача, 2015 йилдан кейин берилганлари – 2022 йил 31 декабргача узайтирилган.
Маълумот ўрнида айтиш жоиз, юқоридаги муддатларгача алмаштирилмаган гувоҳномалар ҳақиқий эмас, деб ҳисобланади.
Ш. Маматуропова,
ЎзА