Ўзбекистон Республикаси Президенти Шавкат Мирзиёев 12 май куни аҳолининг турмуш шароитлари, бунёдкорлик ишлари билан танишиш мақсадида Тошкент шаҳрининг Шайхонтоҳур туманига ташриф буюрди.
Давлатимиз раҳбари дастлаб Самарқанд дарвоза маҳалласида барпо этилган касбга йўналтириш марказида бўлди. Бу ерда ёшлар ва аёлларга савдо, маркетинг, молия, ахборот технологиялари соҳаларидаги замонавий касблар ўргатилади. Кейинчалик уларнинг юқори даромадли иш топишига ҳам кўмаклашилади. Марказ атрофи ободонлаштирилган, ишкомлар ўрнатилиб, токлар экилган.
Шу ерда камбағалликни қисқартириш ва аҳоли бандлигини таъминлаш чора-тадбирлари тақдимот қилинди. 10 май куни ушбу масала бўйича ўтказилган йиғилишда салоҳиятли тадбиркорларни янги иш ўринлари яратишга рағбатлантириш таклифи билдирилган эди.
Масалан, Шайхонтоҳур туманида 51 та маҳалла бор. Салоҳияти юқори тадбиркорлар 100 дан зиёд. Шартнома асосида уларга маҳаллалардаги ишсизлар бириктирилмоқда. Унга кўра, давлат шароит яратади, тадбиркорлар аҳолини касбга ўқитиб, иш билан таъминлайди.
– Бу икки томонлама манфаатли, – деди Шавкат Мирзиёев. – Ҳозир кўп тадбиркорлар фаолиятини кенгайтирмоқчи, ҳаммага малакали ишчи керак. Мақсадимиз – корхоналар амалий мономарказга айланиб, соҳага мутахассис тайёрласин. Бунинг учун давлат инфратузилма, молия, солиқ бўйича енгилликлар беради. Иш ўринлари кўпайгани, аҳолининг харид қобилияти ошгани ҳисобидан бу пул пировардида иқтисодиётга қайтиб тушади. Энг муҳими, бу амалиёт ёшлар учун фақат иш ўрганиш эмас, ҳаёт мактаби бўлади.
Тақдимотда Шайхонтоҳурнинг туризм салоҳиятини ишга солиш бўйича таклифлар ҳам кўриб чиқилди. Пойтахт туманлари ҳокимлари Жанубий Корея, Сингапур каби давлатлар тажрибасини ўрганиши зарурлиги таъкидланди.
Давлатимиз раҳбари ушбу марказдаги спорт-соғломлаштириш мажмуасини ҳам кириб кўрди. Унда ёпиқ сув ҳавзаси ва спорт зали мавжуд.
Бу ерда спортнинг саккиз тури бўйича тўгараклар фаолияти йўлга қўйилган.
Президентимиз спорт залида машғулотларда қатнашаётган ёшлар билан мулоқот қилди.
– Спорт билан шуғулланган ёшлар доимо ҳаётда ўз ўрнини топиб кетади, тартиб-интизомли бўлади, шерикларини ҳам спортга жалб қилади. Бу борада сизларга барча шароитларни яратиб берамиз, – деди давлатимиз раҳбари.
Шундан сўнг Президент тумандаги нодавлат таълим муассасасини бориб кўрди.
Минг ўринли бу мактаб инглиз тили, шарқ тиллари ва аниқ фанларни ўргатишга ихтисослашган. Муассасада ўқув ва компьютер хоналари, STEM лабораторияси, кутубхона, ошхона, спорт зали, бассейн мавжуд.
Мактабнинг янги биноси ўтган йили сентябрь ойида фойдаланишга топширилган. Бугун бу ерда 800 нафардан ортиқ ўқувчи таълим олади.
Мактабда ўқитиш методикаси ўзгармаса, таълим сифати ҳам, мазмуни ҳам, муҳит ҳам ўзгармайди, – деган эди давлатимиз раҳбари таълим тизимидаги ислоҳотларга дахлдор учрашувлардан бирида. Ва, айни масала бугун соҳадаги янгиланишларнинг муҳим мезонига айланган.
Мазкур мактабдаги ўқув ва машғулотлар мамлакатимизда ёшларни камида иккита хорижий тил ва битта ҳунарга ўргатиш талабига мос. Махсус жиҳозланган хоналарда ўқувчилар тикувчилик, дурадгорлик, компьютер сирларини ўрганмоқда. Ёшларнинг қизиқишларига мос турли тўгараклар ҳам ташкил этилган.
Президентимиз ушбу мактаб тажрибаси асосида кичик ҳудудда кўп ўқувчи ўринларини яратиш, нодавлат мактабларда таълим сифатини назорат қилиш муҳимлигини таъкидлади.
Ўқувчилар билан мулоқотда билим энг яхши инвестиция экани, давлат ёшларнинг зўр мутахассис бўлиб, келажакда йўлини топиши учун барча шароитларни яратиши қайд этилди.
Президент Шавкат Мирзиёев Шайхонтоҳур туманидаги Жангоҳ маҳалласида ҳам бўлди.
Мамлакатимизда қуйи тизимга қаратилаётган эътибор ушбу маҳаллада ҳам намоён. Фуқаролар йиғини биноси, кўп қаватли уйлар замонавий қиёфага эга. Майдончалар ва ички йўллар текисланиб, атрофи ободонлаштирилган. Болалар ўйингоҳи ва автотураргоҳ ташкил этилган.
Давлатимиз раҳбари бу ишларни кўздан кечирди. Маҳалла раиси ва вакиллари билан суҳбатлашди.
– Маҳаллада “бешлик” тизимини жорий қилиб, кенг имкониятлар бердик. Бугун улар аҳоли билан давлат ўртасида кўприк. Бу кўприк қанча адолатли, шаффоф, мустаҳкам бўлса, халқимиз шунча рози бўлади, – деди Шавкат Мирзиёев.
Жангоҳ маҳалласида 6 минг 700 нафардан зиёд аҳоли яшайди. Ўндан ортиқ маиший хизмат ва юздан зиёд савдо дўконларида маҳалла ёшлари ҳам ишламоқда. Аҳолининг мазмунли ҳордиқ чиқариши учун ҳам шароитлар яратилган.
Ҳар бир маҳаллага кириб бориш, одамларнинг истак ва талабини манзилли ўрганиш давлат сиёсати даражасидаги масала саналади. Жангоҳ маҳалласида ҳам ишсиз фуқаролар билан мулоқот қилиниб, уларнинг бандлигини таъминлаш чоралари кўрилмоқда. Ижтимоий дафтарларга киритилган 230 нафардан ортиқ фуқаро доимий эътиборда.
Давлатимиз раҳбари “Янги Жангоҳ” бошқарув сервис компанияси фаолияти билан ҳам танишди. У маҳалладаги 52 та кўп қаватли уйга хизмат кўрсатади. 24 нафар мутахассис ва махсус техникалар доим шай ҳолатда. Ҳисоб-китобларда биллинг тизими йўлга қўйилган. Аҳолига қулайлик яратиш мақсадида “Менинг уйим” мобиль иловаси жорий этилган.
Мутасаддилар билан суҳбатда коммунал тармоқларни янгилаб бориш, аҳоли ишончини қозониб, тўловлар барқарорлигини таъминлаш юзасидан кўрсатмалар берилди.
Маҳалла айвонида одамлар билан самимий суҳбат бўлди.
– Биз фаолиятимизнинг биринчи кунидан ҳамма ишларни маҳаллада амалга оширяпмиз. Чунки бу инсонга энг яқин тизим. Маҳаллангиздаги ободлик бир мисол. Бундай ишлар фақат Тошкентда эмас, Қорақалпоғистону Хоразмда ҳам, Қашқадарёда ҳам, ҳамма жойда қилиняпти. Халқимизнинг ўзи – адолатли ҳакам. Бугун юртимиздаги ҳар бир инсон ижобий ўзгаришларни сезяпти. Энди бу ишларни давом эттириб, молия, солиқ, бандлик каби идораларнинг камида 30 фоиз ваколатларини маҳалла даражасига туширамиз. Бу – инсонларнинг оғирини енгил қиладиган, уларга сифатли хизмат кўрсатадиган халқчил тизим бўлади, – деди Президент.
Нуроний отахон ва онахонлар маҳалладаги, умуман, юртимиздаги ўзгаришлардан хурсандлигини таъкидлаб, дуолар қилди.
Президентимиз шу маҳалла яқинида, Абдулла Қодирий кўчасидаги хиёбонда барпо этилган истироҳат йўлагини ҳам кўздан кечирди.
Гавжум шаҳарда, кўп қаватли уйлар яқинида яшил ҳудудлар, истироҳат боғлари ташкил этиш ҳам аҳоли учун қулайлик яратишга қаратилган ташаббуслар сирасига киради.
Ушбу истироҳат йўлагининг умумий узунлиги 3 километрдан ортиқни ташкил этади. Бу масофада олиб борилган ишлар натижасида 11 гектар майдон бутунлай янги қиёфага кириб, ободонлаштирилди.
Қалин дарахтзор ва ўзига хос ландшафт дизайни умумий уйғунлик касб этади. Йўлак бўйлаб жойлаштирилган ўриндиқлар, 10 га яқин савдо расталари, фавворалар бу ерда сайр қилаётганларга қўшимча қулайлик яратади. Бу маскан аҳоли ва хорижлик туристлар учун яна бир диққатга сазовор жойга айланиши таъкидланди.
Зиёдулла ЖОНИБЕКОВ,
Икром АВВАЛБОЕВ,
ЎзА мухбирлари