Айни кунда акциядорлик жамияти Тижорат департаменти мамлакатимизнинг хорижий давлатлардаги элчихоналари кўмагида экспорт ҳажмини ошириш борасидаги ишларни амалга оширмоқда.

Шу муносабат билан “Ўзбекнефтгаз” АЖ, мамлакатимизнинг Покистон Ислом Республикасидаги элчихонаси ва Покистоннинг “ACAMAR GROUP” компанияси ҳамкорлигида айрим турдаги нефть маҳсулотларини экспортга йўналтириш масалаларига бағишланган видеомулоқот ташкил этилди.

Унда “Ўзбекнефтгаз” АЖ Тижорат департаменти раҳбари М.Файзиев ва Ўзбекистоннинг Покистондаги элчихонаси савдо-иқтисодий масалалар бўйича маслаҳатчиси Ж.Саидаҳмедов, Покистоннинг “ACAMAR GROUP” компанияси раҳбари Тариқ Саадат ва бошқалар икки томонлама ҳамкорликнинг амалий аҳамиятини алоҳида таъкидлади.

Суҳбат чоғида авиакеросин ҳамда дизель ёқилғисини экспорт қилиш бўйича музокаралар ўтказилди. “Ўзбекнефтгаз” АЖ томонидан хорижий компанияга нефть маҳсулотларини, жумладан, 10 минг тонна дизель ёнилғиси ва15 минг тонна “Джет А-1” маркали авиакеросин етказиб бериш таклиф этилди.

“Ўзбекнефтгаз” АЖ матбуот хизмати хабарига кўра, видеомулоқотда ушбу нефть маҳсулотлари Ўзбекистон Республикаси қонунчилигига биноан биржа савдолари орқали FCA шарти билан (INCOTERMS-2020 га мувофиқ) сотилиши ҳақида чет эллик ҳамкорларга тушунча берилди.

Таъкидлаш керакки, бу каби тадбирлар мамлакатимизнинг нефть ва газ маҳсулотлари экспорти салоҳиятини ошириш билан бирга миллий маҳсулотимизни янги бозорларга олиб чиқишга хизмат қилади.