Бу ҳақида Ўзбекистон касаба уюшмалари Федерациясининг Қорақалпоғистон касаба уюшмалари ташкилотлари бирлашмаси кенгаши раиси ўринбосари Муратбой Данияров ЎзА мухбирига маълум қилди.
Хусусан, Оролбўйи шаҳар ва туманларда ташкил этилган ҳомийлик хайрияларини мувофиқлаштириш марказлари орқали бирлашма кенгаши ҳамда жойлардаги касаба уюшма органлари томонидан 670 та оилага 101 миллион 461 минг сўмлик озиқ-овқат маҳсулоти ва шахсий гигиена воситаси олиб берилди.
Коронавирус инфекциясига чалинган беморларни даволашда чинакам жасорат ва матонат кўрсатаётган жонкуяр ва олижаноб шифокорларимизни қўллаб-қувватлаш мақсадида касаба уюшмалари томонидан 40 миллион 830 минг сўмлик 233 та комплект ҳимоя коржома ва антисептик воситаси, Қорақалпоғистон Республикаси юқумли касалликлар шифохонасининг 36 нафар тиббиёт ходимига 2 миллион 300 минг сўмлик эсдалик совғаси топширилди. Бундан ташқари, карантин тадбирлари даврида Мўйноқ тумани аҳолисига жами 3 миллион сўмлик 1500 дона тиббий ҳимоя ниқоби етказилиб берилди.
