“Ўзбекистон Республикаси Вазирлар Маҳкамасининг 30 июль куни “Ёқилғи-энергетика ресурсларининг нархлари ва тарифларни ўзгартириш тўғрисида”ги қарори қабул қилинди. Биз мазкур қарор нима учун қабул қилинганини айтиб бериш учун йиғилдик. Кенг жамоатчилик орасида 5 баробар ошди деганлар ҳам бўлди. Бу нотўғри маълумот.

Аслида молиявий интизомни мустаҳкамлаш, ёқилғи энергетика комплекси корхоналарининг барқарор ривожланиши ва безарар ишлашини таъминлаш мақсадида янги нархлар жорий этилди.

Эндиликда 1 киловатт/соат электр энергияси 295 сўм этиб белгиланди. Бу аввалги сумманинг устига 45 сўм қўшилди, дегани. Ёки 1 куб метр табиий газ 380 сўм (+18 фоиз) этиб белгиланди. Аввалги сумманинг устига 60 сўм қўшиляпти.

Бозор иқтисодиётида тош-тарози тўғри бўлиши керак. Нарх-наво эркин бўлиши лозим. Нархнинг ошиши табиий жараён. Бу ҳеч бир вазирлик, ташкилотнинг хоҳиши билан бўлмайди, бозор талаби.

Монопол ташкилотлар ҳисобига салбий ҳолатлар учраётган бўлиши мумкин. Лекин вақти соати билан ҳамма соҳа хусусийлаштирилади.

Маҳсулот таннархи ҳақида гапирадиган бўлсак, мазкур энергия манбаларининг асл таннархи аҳолига сотилаётганидан анча баланд ҳисобланади. 1 киловатт/соат электр энергияси ишлаб чиқариш учун 450 сўм сарфланади. Шунингдек, 1 куб метр табиий газни қазиб чиқариш ва қайта ишлаш 751 сўмни ташкил этади. Шуни эътиборга олиб, давлатимиз томонидан аҳолининг ижтимоий ҳимоясини ташкил этиш мақсадида паст нархлар белгиланди. Харидлар харажатларни қоплайдиган бўлиши керак.”