2017 йилда нафас етишмовчилигини бошидан ўтказган 5 нафар беморни юқори частотали ўпка сунъий вентиляцияси ёрдамида респиратор қўллаб-қувватлаш ишлари олиб борилган.

Республикамизда илк маротаба яқин қариндошлик бўйича жигар ўнг бўлагининг трансплантацияси, яқин қариндошлик бўйича юздан ортиқ буйрак трансплантацияси амалиёти бажарилган.

Ўпка силини даволашда 366, шундан 192 видеоторакоскопик муолажа амалга оширилган ва ҳ.к.

Аммо айрим амалиётларни жорий этиш кечиктирилган ёки бажарилмаган. 2017 йилда ҳудудий ихтисослаштирилган тиббиёт ташкилотларининг жарроҳлик амалиётига дистал сплено-ренал (қора талоқ ва буйрак веналари ўртасида) анастомозларни лапароскопия усулини жорий этиш белгиланган. Мазкур амалиёт учун юқори технологияли лапароскопик томирли асбоблар, гармоник скальпель ускунаси ҳамда юқори малакали кадрлар талаб этилиши боис Дастурнинг ушбу банди бажарилмаган.

Қизилўнгачда зарур пайтда стентлаш учун зарур бўлган 7-10 мГц махсус қурилма ва қизилўнгач стентлари мавжуд эмаслиги сабабли мазкур муолажа ҳозирга қадар татбиқ этилмаган.

2018 йилда ҳудудий ихтисослаштирилган тиббиёт ташкилотларининг урология амалиётига эндоскопик операцияларнинг замонавий комплекси татбиқ этилиши белгиланган. Бугунги кунга қадар мазкур амалиёт фақатгина Республика ихтисослаштирилган урология илмий-амалий тиббиёт марказининг Урганч филиалида амалга оширилган, холос. Ушбу амалиётни бошқа ҳудудларда қўллаш учун зарур бўлган асбоб-ускуналарнинг мавжуд эмаслиги унинг кенг ривожланишига тўсиқ бўлмоқда.

2017 йилда ҳудудий ихтисослаштирилган тиббиёт ташкилотларининг эндокринология амалиётига буқоқнинг тугунли шаклларида ИФА-диагностикасини, нозик игна аспирацион биопсия усулини жорий этиш ва операцияларини ўтказиш белгиланган. Бироқ, шу кунга қадар ҳудудий эндокринология муассасаларида ИФА аппаратининг йўқлиги ушбу амалиётни жорий этиш имкониятини бермаган.

Буларнинг барчаси аҳоли манфаатини таъминлаш учун режалар катта эканлигини, лекин уларни бажаришга келганда масъул шахсларда масъулият етишмаётганини кўрсатмоқда.