Буюк Британиянинг Бирмингем университети Англияда жойлашган давлат тадқиқот университети бўлиб, мазкур университетга 1900 йилда асос солинган. 2021 йилги “Research Excellence Framework” дастурида 129 та институт орасида 13-ўринни эгаллаган. Бирмингем университети QS рейтингида энг олдинги ўринларни эгаллаб келади. Университетда Санъат ва ҳуқуқ, Муҳандислик ва физика фанлари, Ҳаёт ва атроф-муҳит фанлари, Тиббиёт ва стоматология фанлари, Ижтимоий фанлар, Либерал санъат ва фанлар каби факультетлар мавжуд.
“Эл-юрт умиди” жамғармаси ижрочи директори ўринбосари в.б. Жавоҳир Аҳмедов ва Бирмингем университети Халқаро алоқалар департаменти бошлиғи Мичаел Бисселл, Халқаро талабаларни қабул қилиш факультети декани Карл Адашай ҳамда университетнинг халқаро алоқалар бўйича менежери Вен Хао ўртасида онлайн учрашув ташкил этилди.
Қайд этиш лозимки, ўтган 2023 йилнинг июнь ойида Жамғарма ижрочи директори ўринбосари в.б. Жавоҳир Аҳмедов мазкур университетга ташриф буюриб, икки томонлама келишувга эришилган эди. Эришилган келишув бўйича ҳозирги вақтда университетда таҳсил олиш учун Жамғарма томонидан юборилган 4 нафар стипендиат учун ўқув харажатлари тўлови миқдоридан 15 фоиз миқдорда чегирма ажратиш масаласи университет томонидан қўллаб-қувватланган ва тасдиқлангани сабабли октябрь ойида тўланадиган стипендиатларнинг ўқиш харажатларидан мазкур чегирмалар ажратиб тўлашга келишилган эди.
Шу билан бирга, Мичаел Бисселл томонидан Жамғарманинг ҳар бир стипендиати учун Бирмингем университетида таълим олмоқчи бўлган стипендиатлар учун қабул хатини тез фурсатларда олишда кўмаклашиш таъкидланди.
Мазкур университетда ўзбекистонлик 5 нафар стипендиат таълим олмоқда. Уларнинг ҳар бири ўқиш харажатларидан 15 фоиз миқдорда чегирма ажратилган.
Шунингдек, Жавоҳир Аҳмедов 2024 йилда ўқишни режалаштираётган номзодлар учун Бирмингем университетида таълим олиш имкониятлари ҳақида вебинар ташкил этишни таклиф этди ва ушбу таклиф хорижий университет томонидан қўллаб-қувватланди.
Учрашув якунида ҳамкорлик алоқаларининг истиқболларини белгиловчи, юқоридаги таклифларни ўз ичига олган янги икки томонлама меморандумни имзолашга келишиб олинди.
Муҳайё Тошқораева, ЎзА