Qádirli ӯatanlaslar!
Húrmetli diyqan hám fermerler, agrar taraӯınıӊ jankúyerleri!
Janajan diyarımızda atız jumısları, házirgi máӯsim juӯmaǵına jetip atırǵan bul qutlı áyyyamda sizlerdi hám kóp milletli pútkil xalqımızdı Aӯıl xojalıǵı xızmetkerleri kúni menen shın júregimnen qızǵın qutlıqlayman.
Pidákerlik miyneti menen topıraqtan jemis óndirip, xalqımız dasturxanın tolıqtırıp kiyatırǵan sizdey miynetkesh diyqan hám fermerler, sheber baǵman hám sharӯalarǵa, isker agronom hám mexanizatorlar, klasterlerdiӊ tájiriybeli basshıları hám xızmetkerleri, taraӯdıӊ húrmetli veteranlarına ózimniӊ tereӊ húrmetimdi hám jaqsı tileklerimdi bildiremen.
Áziz doslar!
Soӊǵı jılları global klimat ózgerisleri, tábiyǵıy apatshılıqlar, jer hám suӯ resurslarınıӊ jetspeӯshigi aӯıl xojalıǵı taraӯında da áhmiyetli mashqalalardı keltirip shıǵarmaqta.
Áne, usınday qıyın sharayatqa qaramastan, bıyılǵı jılı sizlerdiӊ mashaqatlı miynetiӊiz benen elimizde 9 million tonna dán, 3 million tonadan aslam paxta, 16 million tonnadan aslam ovosh hám palız, 5 million tonna miyӯe hám júzim, 4 million tonna kartoshka , 15 million tonnadan kóp gósh hám sút, 30 mıӊ tonna pille jetistirilgeni – shın qaharmanlıqtıӊ belgisi, desek, hár tárepleme durıs boladı.
Bunıӊ ushın sizlerdiӊ atıӊızǵa hár qansha maqtaӯlar aytsaq, arzıydı.
Álbette, bunday úlken jetiskenliklerge erisiӯde keyingi jıllarda aӯıl xojalıǵınıӊ raӯajlanıӯına berilip atırǵan joqarı itibar, tarmaqta túp-tiykarınan strukturalıq ózgerisler ámelge asırılıp, óndiris qatnasıqları zaman talapları tiykarında jolǵa qoyılıp atırǵanı sheshiӯshi áhmiyetke iye bolǵanın hámmemiz jaqsı túsinemiz.
Ásirese, taraӯǵa aldınǵı agrotexnologiyalar, ilim hám innovaciya jetiskenlikleriniń keӊnen engizilip atırǵanı unamlı nátiyje bermekte. Bıyılǵı jılı 100 mıӊ gektar maydanda kesellik hám zıyankeslerge shıdamlı ónimli paxta sortları egilip, olardan ónim jetistirilgeni bul pikirdi tastıyıqlaydı.
Ǵálle jetistiriӯde resurs únemleytuǵın zamanagóy agrotexnologiyalardı qollanıӯ nátiyjesinde ortasha ónimdarlıq birinshi márte 85 centnerge jetkerildi. Altı mıӊnan aslam tájiriybeli fermelerimiz bul baǵdarda 90-100 centnerlik shekke jetkenin ayrıqsha atap ótiӯ zárúr.
Resurslardı únemleytuǵın intensiv texnologiyalar tiykarında 50 mıӊ gektar maydanda ovosh jetistirilip, ónimdarlıq dástúriy usılǵa salıstırǵanda 200-250 centnerge artqanı, sap dáramat gektarınan 6-8 mıӊ dollardı quraǵanı da áhiyetli jetiskenliklerimizdiӊ qatarına kiredi.
Jıl daӯamında aӯıl xojalıǵı subyektlerine 18 trillion sum jeӊillikli kredit hám 176 milliard sum subsidiya ajıratılǵanı, ulıӯma bahası 3,6 trillion sumlıq 11 mıӊ 600 dana joqarı ónimli zamanagóy texnika hám agregatlar jetkerip berilgeni de máӯsimdi nátiyjeli juӯmaqlaӯda áhmiyetli faktor boldı.
Mámleketimizde aӯıl xojalıǵın klimat ózgerislerine beyimlestiriw, olardıӊ unamsız tásirin jumsartıӯ maqsetinde birinshi márte Milliy baǵdarlama qabıl etildi. Onıӊ orınlanıӯın támiyinleӯ hám ónim jetistiriӯshilerdi qollap-quӯatlaӯ ushın sırt elli shólkemlerden 160 million dollardan aslam qarjılar tartılmaqta.
Bıyıl aӯıllıq jerlerde azıq-aӯqat sanaatın raӯajlandırıӯ, ónimlerdi saqlaӯ hám satıӯ infrastrukturasın raӯajlandırıӯ boyınsha 343 jaӊa joybar iske qosılǵanı dıqqatqa ılayıq bolıp esaplanadı.
Sonday-aq, diyqan xojalıqların shólkemlestiriӯ ushın 75 mıӊ gektar jer maydanları 180 mıӊnan aslam sociallıq jaqtan mútáj xalıq hám jaslarǵa bólip berilgeni hám 200 mıӊnan aslam jumıs ornı jaratılǵanı aӯılda bántlikti támiyinleӯ, real dáramatlardı arttırıӯ, kámbaǵallıqtı qısqartıӯda áhmiyetli rol atqarmaqta.
Qıytaq jerlerde dáramattı arttırıӯ maqsetinde 5145 máhálle «Bir máhálle – bir ónim» principı tiykarında qánigelestirildi.
Sharӯa násilin jaqsılaӯ hám ónim kólemin kóbeytiӯ ushın xalıqqa 40 mıӊ bas qaramal, 82 mıӊ qoy hám eshki jetkerip berildi, shetten 260 mıӊ bas násilli mallar alıp kelindi.
Qádirli doslar!
2025-jıldı mámleketimizde «Qorshaǵan ortalıqtı qorǵaw hám «jasıl ekonomika» jılı» dep járiyalaǵanımız, álbette, biykarǵa emes.

Pútkil táǵdiri hám keleshegi jer-suӯ resursları menen tıǵız baylanıslı aӯıl xojalıǵı ushın bul qarardıӊ áhmiyeti qanshelli úlken ekenin siz, ázizler, ásirese, jaqsı túsinesiz.
Álbette, usı jıl boyınsha qabıl etiletuǵın mámleketlik baǵdarlama taraӯdı turaqlı raӯajlandırıӯ, azıq-aӯqat qáӯipsizligin támiyinleӯ, aӯıl xojalıǵında «jasıl» texnologiyalardı qollanıӯ, ekologiyalıq taza ónimler jetistiriӯ boyınsha jaӊa imkaniyatlar ashadı.
Agrar taraӯdı ilim tiykarında raӯajlandırıӯdı sistemalı jolǵa qoyıӯ, onıӊ barlıq tarmaqlarındaǵı innovaciyalıq jumıstı integraciyalaӯ maqsetinde kelesi jılı Ózbekstan Respublikası Aӯıl xojalıǵı ilimleri akademiyasın shólkemlestiremiz.
Ótken jıllardaǵı unamlı tájiriybe daӯam ettirilip, jáne 100 mıӊ gektar jer diyqan xojalıqların shólkemlestiriӯ ushın xalıqqa bólip beriledi. Paxta jetistiriwde 40 procent maydanda Qıtayda ózin aqlaǵan aldınǵı tájiriybe engiziledi.
Xalıqaralıq sheriklerimiz benen birgelikte kóplegen perspektivalı joybarlar ámelge asırıladı.
«Sanlı aӯıl xojalıǵı» birden-bir integraciyalıq platforması jetistirilip, ónim jetistiriӯshilerge «bir ayna» principi tiykarında kompleksli xızmet kórsetiӯ tártibi jolǵa qoyıladı.
Aӯıl hám máhállelerdi abat etiӯ, sociallıq infrastrukturasın raӯajlandırıӯ, aӯıl xalqı ushın jaӊa jumıs orınların jaratıӯ baǵdarındaǵı jumıslarımız da izbe-iz daӯam ettiriledi.
Húrmetli diyqan hám fermerler, taraӯ xızmetkerleri!
Kórip turǵanınızday, aldımızda úlken ӯazıypalar turıptı Olardı ámelge asırıӯda sizler belsene qatnasıp, óz kúsh-ǵayratıӊız, bilim hám tájiriybeӊiz benen aӯıl xojalıǵınıӊ raӯajlanıӯın jaӊa basqıshqa alıp shıǵıӯǵa múnásip úles qosasız, dep isenemen.
Siz, ázizilerdi búgingi payızlı bayram menen jáne bir ret shın júrekten qutlıqlap, bársheӊizge bekkem densaӯlıq, shaӊaraqlarıӊızǵa tınıshlıq, baxıt-ıǵbal, húrmetli jumısıӊızda úlken tabıslar tileymen.
Hadal miynetiӊiz ushın jáne bir márte úlken raxmet, Bárqulla salamat bolıӊ, ómiriӊizden bereket tabıӊ, qádirdanlarım!

Shavkat Mirziyoev,
Ózbekstan Respublikası Prezidenti