Berdaq atındaǵı Qaraqalpaq mámleketlik universitetinde usı atamada Saǵındıq Nietullaevtıń 70 jıllıǵına baǵıshlanǵan Respublikalıq ilimiy konferenciya bolıp ótti.

Oǵan Qaraqalpaqstan Respublikası Joqarǵı Keńesiniń wákilleri, S.Nietullaev penen birge islesken dosları, kásiplesleri, ilimpazlar, joqarı oqıw orınlarınıń professor-oqıtıwshıları, student-jaslar qatnastı.

Konferenciyanı universitet rektorı A.Reymov alıp bardı.

Ilajda Ájiniyaz atındaǵı Nókis mámleketlik pedagogikalıq institutınıń rektorı, filologiya ilimleriniń doktorı, professor Q.Orazımbetov, yuridika ilimleriniń doktorı, professor L.Qutıbaeva, filologiya ilimleriniń kandidatı J.Esenov hám basqalar ilimiy bayanatlar menen shıǵıp sóylep, S.Nietullaevtıń ómir jolı, dóretiwshiligi, siyasiy iskerligi tuwralı keń túrde maǵlıwmat berdi. Onıń mámleketlik ǵayratker, ilimpaz hám shayır, huqıqtanıwshı ilimpaz-professor sıpatındaǵı miynetleri, ilimiy jumısları, dóretiwshiligi talqılanıp, úlgi etip kórsetildi.

Sonday-aq, ilajda respublikamızǵa belgili mámleketlik ǵayratker, nuranıy Q.Kamalov, akademik J.Bazarbaev, Sh.Usnatdinov hám basqalar shıǵıp sóylep, S.Nietullaevtı hám onıń ámelge asırǵan jumısların eske túsirdi.

Onıń xızmetleri mámleket tárepinen ılayıqlı bahalanıp «Qaraqalpaqstan Respublikasına miyneti sińgen ilim ǵayratkeri» húrmetli ataǵı, sonday-aq, bir neshe medal hám kókirek belgileri menen sıylıqlanǵan.

Atap ótilgenindey, Saǵındıq Nietullaev qaraqalpaq xalqınıń sociallıq, jámiyetlik, siyasiy rawajlanıw tariyxındaǵı belgili iri ǵayratkerlerdiń – el basshılarınıń arasındaǵı iri tulǵalardıń biri sıpatında ayrıqsha tilge alınadı. Onıń respublikamızdıń sociallıq-ekonomikalıq, ilimniń, mádeniyattıń rawajlanıwına qosqan úlesi ayrıqsha.

Ilajǵa Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov qatnastı.

Á.Jiemuratov,

Qaraqalpaqstan xabar agentliginiń xabarshısı.

(B.Ibragimovtıń túsirgen súwretleri).