Ózbekstan Respublikası Prezidenti «Fermer, diyqan xojalıqları hám qıytaq jer iyeleri jumısların jetilistiriw boyınsha qosımsha ilajlar haqqında»ǵı qarardı tastıyıqladı. Hújjettiń tolıq teksti ÓzAda járiyalandı, dep jazadı Kun.uz saytı.
2018-jıl 1-iyuldan:
– barlıq fermer hám diyqan xojalıqlarınıń Ózbekstan fermer, diyqan xojalıqları hám qıytaq jer iyeleri keńesine (Keńes) aǵzalıǵı májbúriy, qıytaq jer iyeleri ushın bolsa ıqtıyarıy bolıp esaplanadı;
– fermer hám diyqan xojalıqlarınıń Keńeste aǵzalıǵınıń juwmaqlanıwı jerge iyelik etiw, onnan turaqlı yamasa múddetli paydalanıw, onı arendaǵa alıw huqıqı biykar etiliwi ushın tiykar boladı;
– Keńesler awıl xojalıǵında shártnama minnetlemeleriniń orınlanıwı boyınsha monitoring hám jámiyetlik qadaǵalawdı ámelge asıradı;
– diyqan xojalıǵı hám 4 sotıxtan kem bolmaǵan qıytaq jerinde bánt bolǵan yamasa usı uchastkada qaramal yamasa 50 bastan kem bolmaǵan qusshılıq penen shuǵıllanıp atırǵan fizikalıq shaxslar tárepinen Pensiya qorına jılına eń kem miynet haqınıń bir esesi muǵdarında qamsızlandırıw tólemi tólengen jaǵdayda, qamsızlandırıw tólemi tólengen jıl miynet stajına kirgiziledi;
– Keńes sistemasında jumıs isleytuǵın pensionerlerge pensiyalar Pensiya qorı qarjıları esabınan tolıq tólenedi;
– fermer, diyqan xojalıqları hám qıytaq jer iyeleri keńesleri tárepinen Pensiya qorına birden-bir sociallıq tólem 5 procent muǵdarında tólenedi.
Qarar tiykarında Ózbekstanda islep shıǵarılmaytuǵın hám onıń aymaǵına sırttan alıp kelinetuǵın jeńil konstrukciyalı ıssıxanalar ornatıw ushın úskeneler, awıl xojalıǵı texnikası hám awıl xojalıǵı transport quralları belgilengen tártipte tastıyıqlanatuǵın dizim boyınsha 2021-jıldıń 1-yanvarına shekem bajıxana tólemlerinen (bajıxana rásmiylestiriwi ushın tólemlerden bólek);
– «Qıytaq jer xızmeti» JShJ yamasa fermer xojalıqları menen dúzilgen úyge alıp islew shártnaması tiykarında jumıs alıp barıp atırǵan qıytaq jer iyeleri – fizikalıq shaxslar olardıń úyge alıp islew jumısı sheńberinde fizikalıq shaxslardan alınatuǵın dáramat salıǵı hám Pensiya qorına májbúriy ajıratpalardan azat etiledi.
Qaraqalpaqstan xabar agentligi