Usı jıldıń 23-mart kúni Tashkent qalasındaǵı Hyatt Regency Tashkent miymanxanasında Ózbekstan Respublikası Joqarı hám orta arnawlı bilimlendiriw ministrligi jáne Gollandiyanıń “Elsevier” kompaniyası menen birgelikte “Scopus” hám “Science Direct” xalıqaralıq ilimiy maǵlıwmatlar bazalarınıń ónimleri ushın Milliy kelisimge saltanatlı túrde qol qoyıw ilajı bolıp ótti. Bul haqqında Daryo.uz xabar bermekte.
Ilajǵa joqarı hám orta arnawlı bilimlendiriw ministri Inom Majidov, “Elsevier” xalıqaralıq kompaniyasınıń vice-prezidenti Feliks Xayest hám kompaniyanıń Oraylıq Aziya hám Ázerbayjan boyınsha aymaqlıq direktorı Aliya Ospanova, Ózbekstan Respublikası Innovaciyalıq rawajlanıw ministrligi, Ózbekstan Ilimler akademiyası, Jáhán bankiniń wákilleri, Tashkent qalasındaǵı joqarı oqıw orınlarınıń rektorları jáne ǵalaba xabar qurallarınıń wákilleri qatnastı.
“Ilim – 2020” milliy rawajlanıw baǵdarlamasınan gózlengen tiykarǵı maqset Ózbekstanda ilimiy potencialdı, joqarı bilimlendiriw mákemeleri professor-oqıtıwshılarınıń ilimiy izertlew jumıslarınıń nátiyjeliligin arttırıw, dúnya tálim resursları, zamanagóy ilimiy ádebiyatlardıń elektron katalogları menen maǵlıwmatlar bazalarına kiriw imkaniyatların jaratıwdan ibarat.
“Elsevier” kompaniyası “Ilim – 2020” milliy rawajlanıw baǵdarlamasında Ózbekstannıń ilimiy orayları hám joqarı oqıw orınları, sonday-aq, ilimpazlardıń dúnya ilimiy reytingindegi ornın kóteriw, respublikalıq ilimiy jurnallardı “Scopus” hám “Science Direct” xalıqaralıq ilimiy maǵlıwmatlar bazası sistemasına kirgiziw, jas ilimpaz hám doktorantlarǵa ilimiy maqalalar tayarlaw jáne olardı joqarı impakt-faktorǵa iye bolǵan basılımlarda járiyalawǵa kómeklesiw kózde tutılǵan.
Qaraqalpaqstan xabar agentligi