Telegram sociallıq tarmaǵınıń tiykarın salıwshısı Pavel Durov óziniń VKontakte tarmaǵındaǵı jeke betinde Rossiyada messendjerdiń bloklanıwına túsinik berip, bul qarardıń úsh unamsız aqıbetin aytıp ótti. Bul haqqında Xabar.uz saytı xabar berdi.

Birinshiden, onıń pikirinshe, bul 15 million rossiyalınıń turmısın awırlastıradı. Ekinshiden, eldegi terror qáwpi aldınǵı dárejede qala beredi.

«Rossiyadaǵı terror qáwpi aldınǵısınday bolıp qala beredi, sebebi ekstremistler basqa messendjerlerdegi shifrlanǵan baylanıs kanalları yamasa «VPN»nen paydalanıwda dawam etedi», – dep jazǵan Durov.

Úshinshiden, bul Rossiyanıń milliy qáwipsizlik dárejesiniń tómenlewine alıp keledi.

«Rossiyalılardıń jeke maǵlıwmatlarınıń bir bólegi Rossiyaǵa neytral bolǵan aymaqtan AQShtan qadaǵalanatuǵın basqa aymaqlarǵa – WhatsApp/Facebookqa ótip ketedi», – dep óz pikirlerin juwmaqlaǵan Pavel Durov.

Aldınıraq Durov tez arada messendjerde bloktı shetlep ótetuǵın ishki usıllar iske qosılıwın da málim etken edi.

Islam Matekov,

Qaraqalpaqstan xabar agentliginiń sholıwshısı.