BMSh Bas xatkeri Antoniu Guterrish Shveciyanıń SVT telekanalına bergen intervyusında házirgi waqıtta «salqın urıs» dáwiri qaytadan baslanǵanlıǵın málim etti, dep jazadı Qalampir.uz saytı.
Bas xatker jurnalisttiń Siriyadaǵı Duma rayonında AQSh, Ullı Britaniya hám Franciya kúshleri tárepinen ámelge asırılǵan raketa hújimi haqqındaǵı sorawına tómendegishe juwap berdi:
«Bizde bunday jaǵdaylardı sheshiw ushın belgili bir qaǵıydalarımız bar edi. Biraq, endi artqa qaytıwdıń ilajı joq. «Salqın urıs» qaytıp keldi. Burınları AQSh penen SSSR arasında qarama-qarsılıq bar edi. Búgingi kúnde bolsa Moskva hám Vashington barlıǵın qadaǵalap otırǵanı joq. Turkiya, Iran hám Saud Arabiyası sıyaqlı birneshe mámleketler de eki blokqa bólinbegen. Usı tárepi qorqınıshlı. Olardı bir-biri menen sóylestiretuǵın mexanizm joq. Biz júzege kelgen keskinlikti jumsartıw ushın eki tárepti sóylesiwge shaqırıwımız kerek. Olar óz ara sóylesip, kelisip alıwı kerek».
Esletip ótemiz, Siriyada ximiyalıq qural qollanǵanı sebepli usınday qurallar saqlanatuǵın obektlerdi joq etiw maqsetinde AQSh, Ullı Britaniya hám Franciyadan ibarat koaliciya Dumaǵa hújim shólkemlestirgen edi.
Qaraqalpaqstan xabar agentligi