Ellikqala rayonındaǵı 18-sanlı Balalar muzıka hám kórkem óner mektebinde Ózbekstan Respublikası Prezidentiniń 2017-jıl 28-iyuldegi «Ruwxıy-aǵartıwshılıq jumıslardıń nátiyjeliligin arttırıw hám tarawdı rawajlandırıwdı jańa basqıshqa kóteriw haqqında»ǵı qararınıń orınlawın támiyinlewge baǵıshlanǵan ámeliy oqıw seminarı bolıp ótti.
Ilajda rayon hákiminiń birinshi orınbasarı R.Matchanov, respublika Ruwxıylıq hám aǵartıw orayı Qaraqalpaqstan Respublikası bóliminiń baslıǵı Q.Yusupov, Ózbekstan Qaharmanı, senator Ǵ. Xojaniyazov, Berdaq atındaǵı Qaraqalpaq mámleketlik universitetiniń docenti J.Hákimniyazov, universitet jas ilimpazlar keńesiniń baslıǵı Q.Nizamatdinov, Ájiniyaz atındaǵı Nókis mámleketlik pedagogikalıq institutınıń aǵa oqıtıwshısı Q.Mámbetov shıǵıp sóylep, joqarıdaǵı atap ótilgen qarardıń orınlanıwın támiyinlewde alda turǵan wazıypalar, Ózbekstan Respublikası Prezidentiniń Oliy Majliske Múrájatı, 2017-2021-jıllarda Ózbekistan Respublikasın rawajlandırıwdıń bes tiykarǵı baǵdarı boyınsha Háreketler strategiyasınan kelip shıǵatuǵın wazıypalarǵa toqtap ótti.
Atap ótilgenindey, ǵárezsizlik jıllarında elimizde jámiyetlik turmıstıń ruwxıy-aǵartıwshılıq tiykarların bekkemlew, milliy ǵárezsizlik ideyasınıń tiykarǵı túsinikleri menen principlerin turmısqa engiziw, jerleslerimizdiń, ásirese, jas áwladtıń júreginde Watanımızdıń táǵdiri menen keleshegi ushın juwapkershilik sezimin arttırıw, jat ideyalarǵa qarsı ideologiyalıq immunitetti kúsheytiwge baǵdarlanǵan úgit-násiyatlaw sisteması qáliplesti. Bul processte respublika Ruwxıylıq hám aǵartıw orayı, onıń qalalıq hám rayonlıq bólimsheleri tárepinen aytarlıqtay jumıslardıń ámelge asırılǵanın atap ótiw orınlı.
Ótken jıl dawamında elimizdi bunnan bılay da rawajlandırıw boyınsha Háreketler strategiyasında názerde tutılǵan maqset hám wazıypalardı orınlaw, «Xalıq penen pikirlesiw hám insan mápleri jılı» Mámleketlik baǵdarlamasında belgilengen ilajlardı ámelge asırıw baǵdarında keń kólemli ilajlar ámelge asırıldı. Ayrıqsha atap ótiw kerek, Prezidentimizdiń baslaması menen alıp barılıp atırǵan reformalar xalqımız tárepinen qollap-quwatlanıp, «Xalıq mámleketlik uyımlarǵa emes, al mámleketlik uyımlar xalqımızǵa xızmet etiwi kerek» degen ideya zamanlaslarımızdıń ómirinde hám kúndelikli turmısında óziniń ayqın kórinisin tappaqta. Xalqımızdıń jámiyetlik belsendiligi, erteńgi kúnge isenimi artpaqta.
Bul Ózbekistan Respublikası Prezidenti tárepinen birinshi márte elimiz parlamenti-Oliy Majliske usınılǵan Múrájatında óz kórinisin taptı. Onda ekonomika, sociallıq, sırtqı siyasat tarawlarında qolǵa kirgizilgen jetiskenlikler menen birge, xalıqtıń mashqalaların sistemalı úyreniw, olardı anıq sheshiw, ásirese, sociallıq sharayatı awır hayal-qızlardı qollap-quwatlaw, jaslar hám hayal-qızlar arasında huqıqbuzarlıq penen jınayatshılıqtıń aldın alıw, olardı jumıs penen támiyinlew máselelerinde orın alıp atırǵan kemshilikler sınǵa alındı. Múrájatta atap ótilgenindey, házirgi waqıtta dúnyanıń ayırım regionlarında júzege kelgen tınıshsızlıq jaǵdayı xalıq migraciyasınıń kúsheyiwine, bul bolsa, óz gezeginde, terrorizm menen ekstremizmniń tarqalawına jáne olardıń global mashqalalardan birine aylanıwına alıp kelmekte. Shańaraq, máhálle hám bilimlendiriw mákemelerinde jaslardıń tárbiyası, jámlespegen jaslar menen maqsetli ideyalıq-tárbiyalıq jumıslar, milliy qádriyatlarǵa itibarsızlıq, erte neke qurıw, shańaraqlıq ajırasıwlar sıyaqlı unamsız jaǵdaylardıń aldın alıwǵa qaratılǵan úgit-násiyat jumıslarınıń kópshilik jaǵdaylarda kútilgen nátiyjeni bermey atırǵanı sır emes. Bunday jaǵdayda milliy mámleketshiligimiz, ǵárezsizligimiz, xalqımızdıń tınısh hám tatıw turmısın hám qáwipsizligimizdi saqlaw hár birimiz ushın eń tiykarǵı wazıypaǵa aylanıp barmaqta.
Bul seminardıń Elliqqala rayonında ótkerilgenligi tosınnan emes. Rayonda sońǵı jılları ruwxıy-aǵartıwshılıq jumıslarınıń nátiyjeliligin arttırıwda aytarlıqtay nátiyjelerge erisilmekte. Sonıń nátiyjesinde jaslar túrli tarawlarda joqarı tabıslardı qolǵa kirgizip kelmekte. Atap aytqanda, Nókis qalasında ótkerilgen «Kamalak juldızları» balalar dóretiwshiligi festivalında Farrux Xasanbaev xalıq sazları baǵdarında laureat bolǵan bolsa, Sabina Saparbaeva «Jıl sárdarı» tańlawında, rayondaǵı 50-sanlı ulıwma bilim beriw mektebiniń oqıwshısı Muxayyo Sharipova «Nawayı izbasarları» tańlawınıń Qaraqalpaqstan Respublikası basqıshında, Shaxnoza Sharipova «XXI-ásir hayal-qızı» tańlawınıń Ózbekstan Respublikası basqıshında jeńimpaz bolǵanlıǵı ruwxıy-aǵartıwshılıq jumıslardıń jaqsı jolǵa qoyılǵanlıǵınıń nátiyjesi bolıp tabıladı.
Rayon jasları sport tarawında da joqarı nátiyjelerge erisip kelmekte. Olardan Balalar hám jas óspirimler sport mektebiniń treneri Temur Tájibaev milliy kurash boyınsha Ózbekstan chempionatında úshinshi orındı, Bunyod Qurbanbaev sambo boyınsha Qaraqalpaqstan Respublikası chempionatında birinshi orındı, 30-sanlı ulıwma bilim beriw mektebiniń oqıwshısı Mohigúl Kamiljanova usı sport túri boyınsha Ózbekstan chempionatında úshinshi orındı qolǵa kirgizdi. Sonday-aq, 30-sanlı ulıwma bilim beriw mektebiniń jáne bir oqıwshısı Feruzbek Ibrohimbaev respublika ashıq turnirinde jeńimpaz bolǵan bolsa, rayonnan 8 sportshı karate boyınsha Ózbekstan chempionı boldı.
Seminarda shıǵıp sóylewshiler, toy merekeler, shańaraqlıq máresim hám basqa da ilajlardı ótkeriw boyınsha respublikalıq «Máhálle» qayırqomlıq jámiyetlik qorı menen «Nuranıy» qorı belsendileriniń gúllán-xalqımızǵa múrájatınıń áhmiyeti, terrorizmge, diniy ekstremizmge, adam sawdasına, «ǵalabalıq mádeniyat» sıyaqlı jat illetlerdiń unamsız aqıbetlerine toqtap ótti.
– Búgingi kúnde dúnyada globallasıw processleri kúsheyip atırǵan bir payıtta bunday ilajlardı ótkeriw ayrıqsha áhmiyetke iye,-deydi respublika Ruwxıylıq hám aǵartıw orayı Qaraqalpaqstan Respublikası bóliminiń baslıǵı Quwanıshbay Yusupov.-Tiykarǵı maqsetimiz, Prezidentimiz qararınıń mazmun-mánisin keń jámiyetshilikke jetkeriw bolıp tabıladı.
Ilaj sońında Ruwxıy-aǵartıwshılıq jumısların alıp barıwda belsendilik kórsetken bir topar úgit-násiyatshılar Húrmet jarlıǵı menen sıylıqlandı.
Seminar qatnasıwshıları rayon hákimliginiń «Ruwxıylıq bólmesi», Bostan social-ekonomikalıq kolledjiniń málemleme-resurs orayınıń jumısları menen tanısıp, rayonnıń dıqqatqa ılayıq orınların sayaxat etti.
D.ABIBULLAEV,
Qaraqalpaqstan xabar agentliginiń xabarshısı.