Bıyıl Nókis qalasındaǵı 16 kóshede iri kapital ońlaw jumısları alıp barıladı. Al, 21-22-kishi rayonlarda hám basqa da kóp qabatlı jaylardıń aldına balalar maydanshası salınıp, jaylardı shiferlaw, átirapında abadanlastırıw jumısları alıp barıladı.

– Ótken jıldan berli A.Dosnazarov kóshesi boyınan 7, E.Alakóz kóshesi boyınan 31 kóp qabatlı turaq jaylar boy kótergen edi. Búgingi kúni olardaǵı jumıslar nátiyjeli dawam etpekte. Qalada bıyıl jámi 12 iri obekt qurılıwı rejelestirgen bolıp, bir qatar orınlarda rekonstrukciyalaw, iri ońlaw jumısları alıp barıladı,-deydi Nókis qalası hákimi Paraxat Tóreshov.

Nókis qalasında bıyıl jańadan 20 dan aslam kóp qabatlı turaq jay salınıwı rejelestirilgen. Búgingi kúnge kelip usı qurılıs obektleri ushın jer orınları ajıratılıp, jumıslar baslap jiberilgen.

Esletip ótemiz, qaladaǵı bıyılǵı qurılıs jumısları ushın «Investiciya baǵdarlaması» tiykarında Bilimlendiriw hám medicina mákemeleriniń materiallıq-texnikalıq bazasın rawajlandırıw qorı, jergilikli byudjet hám Aral boyı regionın rawajlandırıw qorı esabınan jámi 64,5 milliard sum ajıratılǵan.

Á.Jiemuratov,

Qaraqalpaqstan xabar agentligi.