Ózbekstan Jazıwshılar awqamında Prezidentimiz Shavkat Mirziyoevtiń usı jıl 13-marttaǵı «Ullı qazaq shayırı hám oyshılı Abay Qunanbaevtıń dóretiwshilik miyrasın keńnen úyreniw hám úgit-násiyatlaw haqqında»ǵı qararın orınlaw boyınsha shólkemlestiriw komitetiniń májilisi bolıp ótti.
Ózbekstan Jazıwshılar awqamınıń baslıǵı M.Ahmedov hám basqalar Prezidentimizdiń basshılıǵında qońsı mámleketler menen doslıq hám birge islesiw baylanısların bunnan bılay da bekkemlew boyınsha ámelge asırılıp atırǵan keń kólemli jumıslar barlıq tarawlarda, sonıń ishinde, ádebiy-mádeniy tarawlarda da úlken nátiyjeler berip atırǵanın ayrıqsha atap ótti.
2017-2021-jıllarda Ózbekstan Respublikasın rawajlandırıwdıń bes tiykarǵı baǵdarları boyınsha Háreketler strategiyasında da qáwipsizlikti, milletler aralıq tatıwlıqtı hám keńpeyillikti támiyinlew, tereń oylanǵan, óz-ara paydalı hám ámeliy sırtqı siyasat tarawındaǵı tiykarǵı baǵdarlardıń belgilep qoyılǵanı regionda qáwipsizlik, turaqlılıq hám tatıw qońsıshılıq ortalıǵın ornatıw, elimizdiń xalıqaralıq abıroyın jáne de bekkemlewde áhmiyetli baǵdarlama bolmaqta.
Prezidentimizdiń joqarıda atap ótilgen qararı qońsı qazaq xalqına, olardıń ullı dóretiwshisine joqarı húrmettiń úlgisi sıpatında elimizdiń jámiyetlik-mádeniy turmısında áhmiyetli waqıya boldı. Bul hújjet tuwısqan xalıqlar menen doslıq baylanıslardı jańa, joqarı basqıshta dawam ettiriw, mádeniy birge islesiwdi bunnan bılayda bekkemlew, ullı shayırdıń ólmes shıǵarmaların keńnen úyreniw hám engiziwde ayrıqsha áhmiyetke iye.
Ullı aǵartıwshı shayır hám oyshıl, jaqsılıq hám doslıq jırshısı Abay Qunanbaevtıń dańqlı atı hám bay dóretiwshilik miyrası pútkil túrkiy xalıqlardıń júreginde máńgi jasap kelmekte.
Ózbekstannıń qońsı Qazaqstan mámleketi menen óz-ara doslıq hám birge islesiw qatnasıqları jańa basqıshqa kóterilip atırǵan búgingi kúnde bul ullı dóretiwshiniń ólmes miyrası xalıqlarımız ushın jáne de áhmiyetli mániske iye.
Abay Qunanbaev ulıwma insanıylıq qádriyatlar hám miyrim-shápáát sezimleri joqarı perdelerde sóz etilgen kórkem jetik shıǵarmaları, ibratlı turmısı hám jámiyetlik iskerligi menen xalıqlarımız mádeniyatınıń rawajlanıwına úlken úles qosqan.
Xalqımız bul dóretiwshiniń adamgarshilik hám jaqsılıq ideyaların, milliy hám ulıwmalıq qádriyatlar, túrli milletler menen xalıqlar arasında óz-ara húrmet jáne tatıwlıq baylanısların bekkemlewge qaratılǵan shıǵarmaların súyip oqıydı. Olardıń atın sheksiz húrmet penen tilge aladı.
Paytaxtımızda Abay Qunanbaevtıń sawlatlı esteligi boy tiklep turǵanı, kóshelerge hám máhállelerge atı berilgeni bunı dáliylleydi.
Ullı qazaq aǵartıwshısı Abay Qunanbaevtıń ózbek xalqına húrmeti oǵada joqarı bolǵan. Ol óziniń «Hikmetler» kitabında bılay jazadı: «Házirgi kúnde ózbek diyqanı jetistirmegen ósimliktiń ózi joq, ózbek sawdageriniń ayaǵı jetpegen jer joq, olar soqpaǵan buyım joq ekenligin kórmektemen. Awızbirshilikli jasaydı, ókpe-giyneni qozǵamaydı. Orıs sawdagerleri joqlıǵında qazaqlarǵa kiyim-kenshek hám marhumlarına kepin ákelip berdi… Orıslardıń zamanına kelip bolsa jańalıqlardı basqalardan burınıraq ózlestirmekte. Belgili bayları, bilimli mollaları, ónermentshilik hám molshılıq deysiz be, ádeplilik deysiz be-hámmesi olarda bar…»
Prezidentimizdiń «Ullı qazaq shayırı hám oyshılı Abay Qunanbaevtıń dóretiwshilik miyrasın keńnen úyreniw hám úgit-násiyatlaw haqqında»ǵı qararında elimizde ullı qazaq shayırı hám oyshılı Abay Qunanbaevtıń dóretiwshilik miyrasın keńnen úyreniw hám úgit-násiyatlaw, onıń «Saylandı» shıǵarmasın jáne «Ózbek hám qazaq ádebiy baylanısları» atlı ádebiy-talqılaw maqalalar toplamın baspaǵa tayarlaw hám basıp shıǵarıw, Nizamiy atındaǵı Tashkent mámleketlik pedagogika universitetinde «Abay hám ózbek ádebiyatı» atamasında turaqlı ekspoziciya shólkemlestiriw, hár jılı shayır tuwılǵan 10-avgust sánesinde paytaxtımızdaǵı Abay Qunanbaev esteligine gúl qoyıw hám mushoira ótkeriw, oqıwshı hám student-jaslar arasında «Abay shıǵarmalarınıń bilimdanı» shıǵarmalar tańlawın jolǵa qoyıw, ǵalaba xabar qurallarında ullı dóretiwshiniń ómiri hám dóretiwshiligi haqqında bir qatar kórsetiwler jáne esittiriwler, maqalalar berip barıw, onıń ómiri menen dóretiwshiligi haqqında dóretilgen kórkem hám hújjetli filmlerdi Ózbekstan Milliy teleradiokompaniyasınıń telekanalları arqalı kórsetiw, bilimlendiriw mákemeleri, áskeriy bólimler, miynet jámáátleri hám máhállelerde belgili shayırlar hám jazıwshılar, ilimpazlardıń qatnasıwında ushırasıwlar, ádebiy kesheler shólkemlestiriw wazıypaları belgilep qoyılǵan.
Májiliste usı wazıypalardıń orınlanıwı boyınsha tiyisli ministrlikler hám shólkemler wákilleriniń esapları tıńlandı, keleshektegi rejeler hár tárepleme dodalandı.
Ilajda Ózbekstan Respublikası Prezidentiniń Mámleketlik keńesgóyi X.Sultanov shıǵıp sóyledi.
Bayram AYTMURODOV,
ÓzAnıń xabarshısı