Ózbekstan Respublikası Prezidentiniń 2017-jıl 29-marttaǵı PQ-2857-sanlı hám Ministrler Kabinetiniń 2017-jıl 13-sentyabrdegi 718-sanlı qararına muwapıq, usı jıl 2-fevralda Qaraqalpaqstan Respublikası Densawlıqtı saqlaw ministrligi hám bir qatar ministrlikler menen shólkemlerdiń birliktegi «Salamatlıq mekteplerin shólkemlestiriw haqqında»ǵı qospa qararı qabıl etilgen edi.
Onıń jumısların turaqlı túrde úyrenip barıw maqsetinde monitoring toparı dúzilip, usı kúnge shekem bir qatar ilajlar ámelge asırıldı.
Sonnan, Beruniy rayonında «Salamatlıq mektepleri»n shólkemlestiriw, patronaj xızmetin ele de jaqsılaw maqsetinde aytarlıqtay jumıslar islengen. Birge islesiwshi shólkemler menen birgelikte seminarlar shólkemlestirilip, qala hám rayonlardan kelgen qánigeler tárepinen rayonda jasaytuǵın xalıqtıń sociallıq jaǵdayı menen tanısıw, mashqalaların anıqlaw hám olardı saplastırıw, salamat turmıs tárizin úgit-násiyatlaw ilajları ámelge asırılǵan.
Rayondaǵı 13 APJ hám 37 MPJda jasaytuǵın 29 mıńnan aslam xojalıqlarǵa birme-bir kirip shıǵılıp, 38 mıńǵa shamalas xojalıq penen sáwbetlesiwler ótkerilgen.
Nátiyjede 4627 úlgili, 24 mıń 599 qanaatlandırarlı, 1106 patronaj xızmetine mútáj shańaraqlar anıqlanǵan. Al, 7502 shańaraqtıń sistemalı túrde patronaj xızmeti menen qamtılıwı zárúrligi málim bolǵan.
Bunnan basqa anıqlanǵan mashqalalardı óz ornında saplastırıw maqsetinde 4 «Salamatlıq brigadası» shólkemlestirilip, puqaralar medicinalıq tekseriwden ótkerilip, salamatlastırıw jumıslar ámelge asırılmaqta.
– Barlıq qala hám rayonlardaǵı ulıwma bilim beriw mekteplerinde, mektepke shekemgi bilimlendiriw mákemelerinde, kolledj, licey hám máhállelerde úgit-násiyat jumısları alıp barılmaqta,-deydi Qaraqalpaqstan Respublikası Densawlıqtı saqlaw ministrliginiń analıq hám balalıqtı qorǵaw bóliminiń bas qánigesi Z.Siypatdinov. – Atap aytqanda, 5-10-fevral kúnleri «1-7 jas aralıǵındaǵı balalardıń awqatlanıwı», 12-17-fevral kúnleri «Viruslı gepatit hám onıń aldın alıw», 19-24-fevral kúnleri «Qanıazlıqtıń aldın alıw», 26-fevraldan 3-mart kúnleri aralıǵında «Óspirimlerdiń reproduktivlik salamatlıǵı», 5-10-mart kúnleri «Medicinalıq tekseriw hám onıń áhmiyeti», 12-17-mart kúnleri «Salamat anadan salamat bala tuwılıwı – eń úlken baxıt», 19-24-mart kúnleri «Jas shańaraq salamatlıǵı», 26-31-mart kúnleri «Óspirim qızlardıń gigienası» temalarında ushırasıwlar ótkerilip, úgit-násiyat jumısları alıp barıldı.
Qarar boyınsha jumıslar nátiyjeli dawam etpekte.
Qaraqalpaqstan xabar agentligi.