Shańaraq institutın bekkemlew tarawında kadrlardı qayta tayarlaw hám olardıń kónlikpelerin arttırıw boyınsha arnawlı oqıw kursların shólkemlestiriw haqqındaǵı Húkimetlik qararı (MKQ-230, 26.03.2018) qabıl etildi, dep xabar bermekte Ádillik ministrliginiń “Huquqiy axborot” kanalı.
Qararǵa muwapıq, jaslardı shańaraqlıq turmısqa tayarlaw, shańaraqtaǵı kelispewshiliklerdi sheshiwdiń huqıqıy hám psixologiyalıq tiykarların úyretiw, ajırasıwlardıń aldın alıw hám shańaraqlardaǵı ruwxıy-etikalıq qádiriyatlardı bekkemlew tarawında kadrlardı qayta tayarlaw jáne olardıń kónlikpelerin arttırıw maqsetinde oqıw kursları shólkemlestiriledi.
Arnawlı oqıw kurslarına oqıw shınıǵıwların ótkeriw ushın saat boyınsha haqı tólew shárti tiykarında jetekshi bilimlendiriw, izertlew hám ilimiy mákemelerdiń xızmetkerleri, sonday-aq, ámeliyatshı qánigeler tartıladı.
Qayta tayarlaw hám qánigeligin jetilistiriwdiń tastıyıqlanǵan rejesine kirgizilgen hám arnawlı oqıw kurslarına oqıwǵa jiberilgen tıńlawshılardıń tiykarǵı jumıs ornı boyınsha ortasha aylıq is haqı ósiw dáwirinde saqlanıp qaladı.
Qánigeligin jetilistiriw ushın arnawlı oqıw kurslarına jiberilgen basqa qalalı tıńlawshılarǵa tólenetuǵın sutkalıq pul hám oqıw ornına bir márte barıp keliw boyınsha sarplanǵan qárejetler olardı jiberip atırǵan táreptiń esabınan belgilengen tártipte tólenedi.
Arnawlı oqıw kursların shólkemlestiriw ushın Qaraqalpaqstan Respublikası, wálayatlar hám Tashkent qalasındaǵı medicinalıq kásip-óner kolledjlerinen ijara tóleminiń “nollik” dárejesi boyınsha, tiyisli kommunallıq jáne paydalanıw qárejetlerin qaplaw shártisiz oqıw xanaları ajıratıp beriledi.
Qaraqalpaqstan xabar agentligi