Dúnya júzilik turizm shólkeminiń “Ullı Jipek jolı” baǵdarlamasına qatnasatuǵın mámleketler turistler ushın bir formadaǵı viza engiziwdi rejelestirmekte. Bul haqqında Inform.kz saytı xabar bermekte.
“Bul baslamanı barlıq qatnasıwshı mámleketler qollap-quwatlamaqta. Olardıń sanı 30 dan aslamdı quraydı. Ullı Jipek jolı – keń kólemli joba. Evraziya materiginiń úlken bólegin quraydı. Onıń aymaǵı shıǵıstaǵı Yaponiyadan Evropanıń shıǵıs tárepindegi Italiyaǵa shekem baradı. Shını menen de, bul baslama barlıq ellerge baylanıslı, degen menen, dáslep bul ideyanı Oraylıq Aziya elleri arasında iske asırıp kóriw niyetindemiz”, – dedi “Visit Uzbekistan” jobası direktorı Mixail Shamshidov Astana qalasında ótkerilip atırǵan Qazaqstan-Ózbekstan turistlik forumında.
M.Shamshidovtıń aytıwınsha, turizm baǵdarında Ózbekstan hám Qazaqstan bir-birine básekiles bola almaydı. Sebebi, Ózbekstan – otırıqshı el sıpatında turistlerge áyyemgi qala hám esteliklerin usınsa, Qazaqstan áyyemgi kóshpeli mádeniyatı menen ózgeshelenip turadı.
Qaraqalpaqstan xabar agentligi