Ellikqala rayonındaǵı baǵshılıqqa qánigelestirilgen «Adambay-Salovat» fermer xojalıǵı tárepinen xalqımızdı arzan hám sapalı miywe-palız ónimleri menen támiyinlew baǵdarında keń kólemli jumıslar ámelge asırılmaqta.
2006-jılı shólkemlestirilgen xojalıqta búgingi kúni 9,5 gektar maydanda baǵ, 3 gektarda júzimzarlıq jaratıldı. Házirgi waqıtta miywe aǵashlarına forma beriw, qatar araların awdarıw hám egiske tayarlaw jumısları alıp barılmaqta. Bul jumıslarǵa tájiriybeli baǵmanlar tartılǵan. Fermer xojalıǵında 5 adam turaqlı, 20 adam máwsimlik jumıs penen támiyinlengen.
Jetistirilgen ónimlerdi sapalı saqlaw maqsetinde akcionerlik-kommerciyalıq «Agrobank»ten alınǵan 200 million sum kredit esabınan 200 tonnalıq sıyımlılıqtaǵı miywe-palız ónimleri saqlanatuǵın muzlatqıshlı qoymaxana iske túsirildi. Bunnan tısqarı, hár biri 150 tonnalıq sıyımlılıqtaǵı eki usınday muzlatqıshlı qoymaxana paydalanıwǵa tapsırıldı. Ulıwma 500 tonnalıq muzlatqıshta tek ózleriniki ǵana emes, al qońsılas fermer xojalıqları tárepinen, sonday-aq, xalıqtıń qıytaq jerlerinde jetistirilgen ónimler sapalı saqlanadı. Házirgi waqıtta bul jerde Samarqand wálayatınan alıp kelingen tuqımlıq kartoshka saqlanıp, egis waqtında aymaqtaǵı fermer xojalıqlarına shártnama tiykarında tarqatıladı.
Baǵdıń qatar aralarına tárbiya beriw ushın eki dana baǵshılıq traktorı, egis agregatları, muzlatqıshlarda xızmet kórsetetuǵın «ISUZU» hám LABO markalı júk avtomashinaları, sonday-aq, jerlerdiń meliorativlik jaǵdayın jaqsılaw maqsetinde zamanagóy ekskovator satıp alındı.
-«Baǵdıń ústi alladan, astı bendesinen»,-degenindey, baǵshılıq tarawı úlken dáramat dáregi,-deydi fermer xojalıǵınıń baslıǵı Salovat Atabaev.-Bul ushın oǵan ayrıqsha mehir menen tárbiya beriw talap etiledi.
Fermer xojalıǵı aǵzaları jetistirilgen ónimdi sapalı saqlaw menen bir qatarda, onı usı jerdiń ózinde qayta islep, tayar ónim etip shıǵarıwdı óz aldına wazıypa etip qoydı. Usı maqsette fermer xojalıǵınıń shólkemlestiriwinde «Bostan agrosanaat sawda» juwapkershiligi sheklengen jámiyeti túrindegi agrofirma dúzilip, jumıs basladı. Agrofirmanıń janında miywe-palız ónimlerin qayta isleytuǵın cex iske túsirildi. Bul jerde varene, tomat pastası, sous, sherbet, salat sıyaqlı toǵız túrdegi ónim islep shıǵarıladı. Eń áhmiyetlisi, bul ónimler Rossiya hám Qazaqstan ellerine eksportqa jiberiledi. Sonıń esabınan 15 adam turaqlı, cex islep turǵan payıtında usı aymaqtaǵı 50 den aslam hayal-qız jumıs penen támiyinlenedi.
D.ABIBULLAEV
Qaraqalpaqstan xabar agentliginiń xabarshısı.