Búgingi kúnimizdi ǵalaba xabar qurallarısız kóz aldımızǵa keltire almaymız. Sanlı televidenie arqalı hár qıylı formattaǵı telekanallar hár bir úyge kirip keldi.
Usınday imkaniyatlardan paydalanıw niyetinde bolǵan puqara G.Smetova da tyuner satıp alıw maqsetinde Xojeli diyqan bazarındaǵı turmıslıq texnika dúkanınan tyuner satıp aladı. Biraq, úyine barǵanında onıń sapasız ekenligi anıqlanadı. Ol dúkanǵa qaytıp kelip, tyunerdi basqasına almastırıp yamasa pulın qaytırıp beriwin soraydı. Satıwshı oǵan kelisim bermeydi. Bunnan narazı bolǵan G.Smetova Xojeli rayonlıq tutınıwshılardıń huqıqların qorǵaw jámiyetine múrájat etedi. Usı múrájat 3 kúnde unamlı sheshimin tawıp, tyuner basqasına almastırıp berildi.
* * *
«QARÍZDAR» QARÍZDAR EMES EKEN
Qońırat rayonında jasaytuǵın S.Nurıllaev rayonlıq tutınıwshılardıń huqıqların qorǵaw jámiyetine Qaraqalpaq elektr tarmaqları kárxanası akcionerlik jámiyeti Qońırat filialı tárepinen onıń shańaraǵına tiykarsız túrde qarızdarlıǵı boyınsha maǵlıwmatnama berilgeninen narazı bolıp, jazba túrde múrájat etedi.
Bul másele jámiyet qánigeleri tárepinen úyrenip shıǵılıp, qayta xatlaw ótkeriledi. Nátiyjede puqara S.Nurıllaevtıń 68 kilovatt elektr energiyası ushın aldınnan tólep qoyǵanlıǵı anıqlanadı hám jámiyettiń járdeminde tutınıwshınıń paydasına 13 mıń 892 sum qayta esaplap berildi.
Qaraqalpaqstan xabar agentligi.
(materiallar QR Tutınıwshılar huqıqların qorǵaw jámiyetleri Federaciyasınıń maǵlıwmatları tiykarında tayarlandı)