Nawrız ulıwma xalıqlıq bayramın múnásip bayramlawǵa tayarlıq kóriw, xalqımız arasında milliy qádiriyatlarımızǵa tán bolǵan óz ara miyrim-shápáát hám jáne de kúsheytiw, biyminnet járdem sıyaqlı jaqsı pazıyletlerdi jetilistiriw, mákan puqaralar jıyınları, xalıq jasaytuǵın orınlardı abadanlastırıw jáne kógallandırıw, respublikanıń barlıq aymaqlarında sanitariyalıq jaǵdaylardı jaqsılaw maqsetinde Húkimetlik biylik qabıl etildi. Bul haqqında Ádillik ministrliginiń “Huquqiy axborot” kanalı málim etti.

Biylikke muwapıq, 2018-jıl mart-aprel aylarında elimizdiń barlıq aymaqlarında abadanlastırıw hám kógallandırıw aylıǵı jáne 18-19-mart kúnleri ulıwma xalıqlıq qayırqomlıq shembiligi ótkeriledi.

Shembilik múnásibeti menen, ministrlikler, vedomostvolar hám basqa shólkemlerde miynet etip atırǵan xızmetkerlerdiń bir kúnlik miynet haqısı muǵdarındaǵı qarjıları Ózbekstan “Máhálle” qayırqomlıq jámiyetlik qorınıń banktegi esap betlerine ıqtıyarlı ráwishte ótkeriliwi belgilendi.

Qayırqomlıq shembiliginen túsken qarjılar kem támiyinlengen, baǵıwshısınan ayrılǵan shańaraqlarǵa, sociallıq qorǵawǵa mútáj bolǵan nuranıylarǵa, mayıplıǵı bolǵan adamlarǵa, jalǵız baslı qarıyalarǵa materiallıq jáne ruwxıy járdem kórsetiw sıyaqlı ilajlarǵa sarplanıwı názerde tutılǵan.

Qaraqalpaqstan xabar agentligi