Ózbekstan Qorǵanıwǵa kómeklesiwshi “Vatanparvar” shólkeminiń oraylıq Keńesi hám Respublikalıq texnikalıq hám ámeliy sport túrleri orayı tárepinen Surxandárya wálayatınıń Termiz qalasında sporttıń motokross túri boyınsha Ózbekstan chempionatınıń birinshi basqıshı bolıp ótti.
Jarısqa “Vatanparvar” shólkeminiń Qońırat rayonlıq ámeliy sport texnikalıq klubınıń motokross dógereginiń aǵzaları da qatnasıp, ózleriniń shaqqanlıǵın kórsetip, ulıwmalıq esapta 1-orındı iyeledi. Bul haqqında rayon hákimliginiń rásmiy veb-saytı xabar bermekte.
Maǵlıwmatlarǵa qaraǵanda, jeke tártipte komanda aǵzası J.Saparbaev 65 sm kub kólemdegi motocikller kategoriyasında ekinshi orın, I.Uzaqbaev 125 sm kub kólemdegi motocikller kategoriyası boyınsha birinshi orındı, jas óspirimler arasında J.Xojaniyazov 125 sm kub kólemdegi motocikller kategoriyası boyınsha úshinshi orındı iyeledi.
Qaraqalpaqstan xabar agentligi