8-mart – Xalıqaralıq hayal-qızlar bayramı múnásibeti menen Qaraqalpaqstan teleradiokompaniyası «Qaraqalpaqstan» telekanalınıń bas redaktorı Altıngúl Óteniyazova «Ózbekstan Respublikasına xızmet kórsetken jurnalist» ataǵın alıwǵa miyasar boldı.
Altıngúl Óteniyazova xalqımızǵa Qaraqalpaqstan telekanalındaǵı «Ayqulaq», «Aramızdaǵı ápsana», «Ata-mákan saǵınıshı», «Qálbimdegi qosıqlar» atamasındaǵı kórsetiwler arqalı jaqsı tanıs. Onıń shireli, janǵa jaǵımlı hawazı bárshege birdey unaydı. Tamashagóyler onıń kórsetiwlerin asıǵıslıq penen kútedi.
Altıngúl – xalıqtıń júregine jaqın perzent. Jurnalistika tarawında kóp jıllardan berli (1991-j.) jemisli miynet etip, mashaqatlı hám maqtanıshlı jollardı basıp ótken ustaz jurnalist.
Ol 1965-jılı Taxtakópir rayonında tuwılǵan. «Júreklerde bar bol muhabbat», «Jaqsılıqqa tájim», «Ayqulaq» qosıq kitapları baspadan shıqqan. Onıń jazǵan qosıqları kópshiliktiń júrek tórinen orın alıp, ayırımları xalıq súyip tıńlar qosıqlarǵa aylanǵan («Tuwılǵan-Watan», «Netermen», «Dúnya», «Xalqım», «Ayjigit», «Qaraqalpaq qızıman» hám taǵı basqa).
A.Uteniyazova «Arzıwlı jıllar» teleserialı, «Tırnalar kiyatır» radiojurnalı, «Muhabbat hám ǵázep», «Jigittiń ıǵbalın bersin» atamasındaǵı vidiofilmlerdiń avtorı.
Jaqın kúnlerde shayırdıń «Ańlattıń maǵan» kitabı baspadan shıǵıwı kútilmekte.
A.Uteniyazovanıń qálemine tiyisli «Qızıń-ar-namısıń» spektakli Berdaq atındaǵı Qaraqalpaq mámleketlik akademiyalıq muzıkalı teatrında saxnalastırıldı.
– Elbasshımızdıń hayal-qızlarǵa bolǵan húrmetinen tóbemiz kókke jetti. Ol barlıq miynetti súygen hayal-qızlarımızdıń miynetlerin múnásip bahaladı dep oylayman, – deydi maqalamız qaharmanı. Minekey shákirtlerim de izimdi basıp kelmekte. Olar arasınan Gúlbáhár Aqımbetova, Shahzada Bazarbaeva «Zulfiya» atındaǵı mámleketlik sıylıqtıń laureatları boldı, Lázzet Esemuratova bolsa, televideniede tanımalı jurnalist bolıp jetilisti. Olardıń jetiskenligi men ushın úlken maqtanısh.
Altıngúl apa jámiyette belsendi hayal, shańaraqta ádiwli ana, opalı ómirlik joldas, aqlıqlarınıń súyikli apası.
Shańaraqta ómirlik joldası Tolıbay Pirimbetov penen birge 3 perzent hám 2 aqlıqtı tárbiyalamaqta. Balaları joqarı maǵlıwmatqa iye. Olar da jámiyetimizdiń rawajlanıwı jolında xızmet etpekte.
Tárbiya SEYTNAZAROVA,
Qaraqalpaqstan xabar agentligi xabarshısı