Siz 2000 jıl yaki 1000 jıl aldınǵı dáwirlerge túsip qalıwdı qáleysiz be? Bálkim, waqıt mashinası haqqında árman etersiz?
Ármanlarıńız orınlanıwın qáleseńiz, Qaraqalpaqstan Respublikası Beruniy rayonı aymaǵında jaylasqan ájayıp áyyemgi hám orta ásirler esteligi – Ayazqala qorǵanına sayaxat etiwińizdi másláhát etemiz.
Ayazqala úsh estelikten ibarat (Ayazqala 1,2,3). Tábiyǵıy tóbelik ústinde jaylasqan Ayazqala-1 qorǵanı b.esh. IV-III ásirlerde qurılǵan. Bunnan 2300 jıl burın!!!
Ayazqala-2 qorǵanı VII ásirdiń ekinshi yarımı – VIII ásir baslarına tiyisli bolıp, XIII ásirde onıń bir bóliminen turaq jay sıpatında paydalanılǵan.
Házirgi kúnde bul jerde «Ayazqala» turistlik kempingi xızmet kórsetpekte.
Ayazqalada tigilgen otawlarda dem alǵan, barxan qumlar arasında túyelerde seyil etip, keshki payıt ortaǵa jaǵılǵan ot átirapında birgelesip qosıq aytıp, oyın oynaǵan sayaxatshı ózin misli orta ásirlerge túsip qalǵanday sezinedi.
«Oraylıq Aziyanıń ullı eki dáryası aralıǵındaǵı Áyyemgi Mısır mámleketi» (bul teńewdi belgili arxeolog ilimpaz S.P.Tolstov qollanǵan) atanǵan Qaraqalpaqstan topıraǵında bunday estelikler mıńlap gezlesedi.
Solay eken, Kúnshıǵısqa sapar shekken azamat, asıq, dostım, Qaraqalpaqstanǵa jetiwge!
Foto: Qaraqalpaqstan xabar agentligi jámááti tárepinen shólkemlestirilgen mediaturdan kórinisler
Ayazqala-2
Qaraqalpaqstan xabar agentligi
Foto: M.Xabibullaev