Ústirtke sayaxat
Qaraqalpaqstan kóbinese ekstremal turizm baǵdarı boyınsha shet elli turistlerdiń dıqqatın tartıp kelmekte. Ústirt platosına, Aral teńizi aymaǵına ekstremal sharayatta sayaxat etiwshiler sanı jıldan-jılǵa artıp barmaqta.
Jaqında qabıl etilgen Ózbekistan Respublikası Prezidentiniń «Ózbekistan respublikasınıń turizm potencialın rawajlandırıw ushın qolaylı sharayatlar jaratıw boyınsha qosımsha shólkemlestiriw ilajları haqqında»ǵı pármanı menen ekstremal turlardı shólkemlestiretuǵın Qaraqalpaqstan Respublikasında dizimge alınǵan turoperatorlarǵa ájayıp jeńillik jaratıldı. Yaǵnıy Qaraqalpaqstan Respublikasında dizimge alınıp, licenziyaǵa iye bolǵan turizm operatorlarına ádettegiden ózgeshe tárizde ekstremal turlardı shólkemlestiriw ushın dvigatel kólemi 2,4 l. den az bolmaǵan joqarı ótiw qábiletine iye bolǵan alıp kirilip atırǵan transport qurallarına avtotransport quralların dizimge alıw boyınsha ayrıqsha mámleketlik nomer seriyasın engizgen halda hám olardan tek ǵana Qaraqalpaqstan Respublikası aymaǵında paydalanıw shárti menen 5 jıl múddetke bólip-bólip tólew arqalı ámeldegi stavkanıń 25 procenti muǵdarında bajıxana tólemlerin tólewge ruqsat etildi.
Aralǵa sayaxat
Bul degeni qaraqalpaqstanlı turoperatorlar endi Ústirtte, Aral teńizi aymaǵında hám basqa da ekstremal sayaxat orınlarında isenimli júre alatuǵın jol tańlamas transportlardı («Jeep», «Toyota» hám t.b.) shet ellerden bajıxana tólemleri ushın 25 procent muǵdarında (ámeldegi stavka 100 procent) ámelge asırıp, 5 jıl ishinde bólip-bólip tólew arqalı satıp alıwı múmkin. Bul transportlarǵa ayrıqsha mámleketlik nomer seriyası beriledi hám bul transportlar tek ǵana Qaraqalpaqstan aymaǵında ǵana háreket ete aladı.
Aralǵa sayaxat
Esletip ótemiz, ótken jılı Ústirt platosı boylap Aral teńizi aymaǵına Qaraqalpaqstan xabar agentligi tárepinen eki márte, Ózbekistan Jaslar awqamı tárepinen bir márte qánigeler, alımlar hám ǵalaba xabar quralları xızmetkerleriniń qatnasıwında mediatur shólkemlestirilgen bolsa, dúnyaǵa belgili «Discover rally tour» tárepinen Tashkent qalasınan Aralǵa shekemgi aralıqta 4000 kilometrlik ralli tur ótkerilgen edi.
Qaraqalpaqstan xabar agentligi