Ózbekistan Respublikası Prezidenti Baspasóz xızmeti janındaǵı press-xollda Ózbekistan Respublikası Turizmdi rawajlandırıw boyınsha mámleketlik komiteti tárepinen baspasóz ánjumanı ótkerildi.
Turizmdi rawajlandırıw boyınsha mámleketlik komitetiniń baslıǵı A.Abduhakimov elimizdiń turizm potencialın arttırıw, sistemada birden-bir mámleketlik siyasattı ámelge asırıw, xalqımızdıń tariyxıy-mádeniy miyrasın keńnen úgit-násiyatlaw, «Qáwipsiz turizm» koncepciyasın orınlaw, milliy turizm ónimlerin hám brentlerin jáhán sayaxatshılıq bazarına alıp shıǵıw baǵdarında ámelge asırılıp atırǵan jumıslar haqqında maǵlıwmat berdi.
Turizm ekonomikanıń jedel rawajlanıp atırǵan iri tarmaqlarınan biri bolıp, xalıqtıń dáramatların hám bántligin arttırıwda, elimizdi ekonomikalıq-sociallıq rawajlandırıwda úlken áhmiyetke iye.
Ózbekistanda búgingi kúnde 7 mıń 300 den aslam mádeniy miyras obekti, sonıń ishinde, 4 mıń 200 den artıq arxeologiyalıq estelik, 2 mıńnan zıyat arxitektura obekti bar. Olardıń 500 den aslamında turistler kelip kóriwi ushın sharayatlar jaratılǵan jáne turizm baǵdarlarına kirgizilgen. Bunnan tısqarı, 8 qorǵalatuǵın aymaq, 3 milliy tábiyat baǵı, 6 mámleketlik tábiyat esteligi hám 11 buyırtpaxana turistlik tarawdaǵı imkaniyatlardı júzege shıǵarıwǵa xızmet etpekte.
2017-jılı elimizdiń turizm potencialın bunnan bılay da rawajlandırıw boyınsha bir qatar jumıslar ámelge asırıldı. Prezidentimizdiń 2016-jıl 2-dekabrdegi «Ózbekistan Respublikasınıń turizm tarawın jedel rawajlandırıwdı támiyinlew ilajları haqqında»ǵı pármanına tiykarlanıp Turizmdi rawajlandırıw boyınsha mámleketlik komiteti hár qıylı ministrlikler hám vedomstvolar menen birgelikte kóplegen joybarlar boyınsha ámeliy jumıslardı basladı.
Turizm tarawınıń nızamshılıq tiykarın bekkemlew, tarawdaǵı qatnasıqlardı huqıqıy tártipke salıw sheńberinde jańa redakciyadaǵı «Turizm haqqında»ǵı nızam joybarı hám 30 normativlik-huqıqıy hújjet islep shıǵıldı, olardan 22 si qabıl etildi.
Ótken jılı elimizge 2,5 million turist kelgen, turizm xızmetleri eksportı 1 milliard 557 million dollardı quraǵan. Sonday-aq, 128 turoperatorlıq xızmetlerdi kórsetetuǵın isbilermenlik subektleri shólkemlestirilip, búgingi kúnde olar 561 ge jetken. Turoperatorlar tárepinen turistlerge kórsetilip atırǵan turistlik ónimlerdiń kólemi hám xızmet túrleri keńeydi.
Buxara, Samarqand, Xiywa hám Shahrisabz qalaları qáwipsiz turizm aymaqları dep járiyalandı, bul boyınsha tiyisli ólshemler islep shıǵılıp, qáwipsizlik ilajları engizildi. Prezidentimizdiń 2017-jıl 5-dekabrdegi pármanı tiykarında Tashkent wálayatında «Charvaq» erkin turistlik zonası shólkemlestirildi.
Buxara hám Samarqand qalalarında «Áyyemgi Buxara» hám «Samarqand siti» turizm zonaların shólkemlestiriw, ulıwma esapta 450 ge shamalas joybardı ámelge asırıw, sonıń ishinde, 50 mádeniy miyras obektin restavraciyalaw hám konservaciyalaw, 50 den aslam miymanxana qurıw hám qayta tiklew, 100 ge jaqın ulıwma awqatlanıw obektin qurıw jumısları alıp barılmaqta.
Baspasóz ánjumanında shet elli turistler ushın viza hám dizimge alıw tártibi ápiwayılastırılǵanı, jeke tártiptegi shet elli turistler ushın 30 kún múddetke beriletuǵın birden-bir kiriw turizm vizaları engizilgeni hám vizalardı rásmiylestiriw bahası 60 AQSh dollarınan 40 dollarǵa zaytılǵanı atap ótildi.
Tarmaqqa málimleme-kommunikaciya texnologiyaları izbe-iz engizilmekte. Elimizdegi 600 den aslam turistlik obektin birlestirgen «3-M3hm9nx9na» avtomatlastırılǵan sisteması iske túsirilip, shet elli hám jergilikli puqaralardıń esabın alıp barıw procesi hám bul baǵdardaǵı esaplar elektron túrge ótkerildi.
Ilajda turizm xızmetleriniń sapasın dúnya júzilik talaplarǵa muwapıqlastırıw, aeroportlarda bajıxana rásmiylestiriwin ótkeriwdi ápiwayılastırıw baǵdarında da úlken qádemler taslanıp atırǵanı atap ótildi. Barlıq aeroportlarda «jasıl» hám «qızıl» jollar shólkemlestirilgeni, turistlerge qalalarımızdıń kartasın beriw, taksi basqarıwshılarınıń mádeniyatın arttırıw, transport xızmetin keńeytiw baǵdarındaǵı joybarlar haqqında málim etildi.
Sonıń menen birge, shet elli turistlerdiń narazılıqlarına sebep bolıp atırǵan faktorlar, máselen, kafe hám restoranlardıń túngi islew waqtı sheklengeni, bir, eki juldızlı miymanxanalarǵa az itibar berilip atırǵanı, avtobuslardıń jetispewi, aymaqlarda sanitariyalıq-gigienalıq orınlar jetkilikli emesligi sıyaqlı máseleler haqqında da sóz bolıp, olardı saplastırıw boyınsha keń kólemli jumıslar izbe-iz ámelge asırılatuǵını atap ótildi.
Jurnalistlerdiń sorawlarına hár tárepleme juwap berildi.
M.ELMURODOV,
ÓzA nıń xabarshısı