Ózbekstan jaslar awqamı hám Ózbekstan jeńil atletika federaciyası tárepinen usı jıldıń mart ayında respublikanıń barlıq aymaqlarında «Jaslar marafonı»n ótkeriw rejelestirilgen. Maǵlıwmatlarǵa qaraǵanda, marafon oraylıq kósheler boylap belgilep alınǵan aralıq boyınsha ótkeriledi.

Marafondı ótkeriw boyınsha tastıyıqlanǵan ulıwmalıq rejege muwapıq, «Jaslar marafonı» háwesker juwırıwshılar arasında tómendegi aralıqlarda ótkeriledi:

2018 metr;
3 kilometr;
21 kilometr.
Marafonǵa aymaqlardaǵı shólkemlespegen jaslar, bilimlendiriw mákemelerinde oqıp atırǵan 16-30 jasqa shekemgi bolǵan qız-jigitler qatnasqwq múmkin. Marafon jeńil atletika qaǵıydaları tiykarında ótkeriledi.

Ǵalabalıq juwırıw tómendegi jas kategoriyaları boyınsha toparlarǵa bólingen halda ótkeriledi:

1-basqısh – 10-11-klass mektep oqıwshıları arasında;

2-basqısh – Akademiyalıq licey hám kásip-óner kolledjleriniń oqıwshıları arasında;

3-basqısh – Joqarı oqıw orınları studentleriniń arasında;

4-basqısh – Aymaqlardaǵı shólkemlespegen jaslar arasında.

Marafon qatnasıwshısı sport formasında bolıwı shárt.

Maǵlıwmatlarǵa qaraǵanda, marafonǵa qatnasıw boyınsha talapnama mart ayınıń 17-sánesine shekem Ózbekstan jaslar awqamınıń jergilikli keńeslerinde hám marafon.yi.uz saytında on-layn formada ámelge asırıladı.

Marafonda 1-, 2- hám 3-orınlardı iyelegen jeńimpazlar medal, diplom hám estelik sawǵaları menen sıylıqlanadı.

Marafonnıń Nókis qalasındaǵı ótkeriliw sánesi hám ornı haqqında keyinirek tolıq maǵlıwmat berip ótemiz.

Islam Matekov,

Qaraqalpaqstan xabar agentliginiń sholıwshısı.