Ibrayım Yusupov atındaǵı qánigelestirilgen mámleketlik mektep-internatınıń 10-klass oqıwshısı Ayjamal Qalbaeva Nókiske altın medal alıp keldi. Ol Tashkenttegi «Túrkistan» sarayında «Islam Kárimov – biyǵárez Ózbekistannıń tiykarın salıwshısı» kitap-albomın tanıstırıwǵa baǵıshlanǵan «Jalın kibi janıp, ózgelerdiń jolın jarıq et» súreni astında ótken máresimge qatnasıp keldi.

– Ol jerde rus tilinde shıǵıp sóylep, Birinshi Prezidentimizdiń eń qıyın dáwirlerde jaslardı aqıllı, bilimli etip tárbiyalawǵa, ásirese, hayal-qızlardı qollap-quwatlawǵa ayrıqsha itibar qaratqanı, Zulfiya atındaǵı mámleketlik sıylıqtı engizilgeni hám bilimlendiriw tarawında úlken jetiskenlikler júz bergeni haqqında ayttım, – deydi Ayjamal. – Úlken sahnada birinshi shıǵıwım, dáslep albıradım, biraq sahna maǵan ilham berdi hám men óz pikirlerimdi tolıq jetkere aldım. Ótkerilgen ilaj mende úlken tásir qaldırdı. Keleshekte jurnalist bolmaqshıman. Zamanagóy, operativ jeke menshik televideniem bolıwın arzıw etkenmen. Rus, inglis tillerin bilemen. Bunda toǵız jıl bilim alǵan Bilimlendiriw hám rawajlandırıw orayı «Progress» qánigelestirilgen mektebiniń roli ayrıqsha. Házirgi kúnde koreys tilin úyrenip atırman. Ata-anamnan ótken «jazıw»shılıǵım bar. Shıǵarmalarım kitap bolıp basılıw aldında tur. Jurnalistikanı rawajlandırıwǵa bar kúsh-jigerimdi baǵıshlayman.

Ayjamalǵa arzıwına erisiwin, niyeti joldası bolıwın tileymiz.

Móldir Igilikova,

Qaraqalpaqstan xabar agentligi