17 jıldan berli gaz tarmaǵında jumıs islep kelgen, házirgi kúnde isbilermenlik penen aylanısıp atırǵan tórtkúlli Marufjon Rajapbaev tábiyǵıy gazdi filtrlewshi úskene oylap taptı.

Bul úskeneniń áhmiyeti sonnan ibarat, eger usı úskeneni gaz támiynatı tarawında keńinen qollansa mámleket bunnan jılına 380 mlrd. sum únemley aladı.

Hámmege belgili, tábiyǵıy gaz bir qansha basqıshlarda tazalanıwına qaramastan, tutınıwshılarǵa jetip barǵanǵa shekem gaz qubırlarınıń ishki tárepi jemiriliwi aqıbetinde payda bolatuǵın kereksiz shıǵındılar tikkeley gaz esaplaǵısh mexanizmine kelip túsedi. Bul bolsa, mexanizmniń buzılıwına, tábiyǵıy gaz kóleminiń durıs ólshenbewine, texnologiyalıq joǵaltıwlardıń kóbeyiwine, iyesi anıqlanbaǵan real emes qarızdarlıqtıń ósip ketiwine alıp kelmekte.

Ózbekstan Respublikası boyınsha 4 millionnan aslam gaz esaplaǵıshlardıń texnologiyalıq joǵaltıwların kúnige shama menen 1 metr kubqa kemeytiw nátiyjesindei iyesi anıqlanbaǵan gazdıń sarplanıwı muǵdarı ayına 120 million metr kubtı, jılına 1440,0 million metr kubtı quraydı. Nátiyjede real emes qarızdarlıqtı 380 mlrd. sumǵa kemeytiw múmkin.

Tórtkúl rayonında jaylasqan «Safety filtr» juwapkershiligi sheklengen jámiyeti tárepinen islep shıǵarılıp atırǵan tábiyǵıy gazdı filtrlewshi bul úskenege Ózbekstan Respublikası Intellektual múlk agentligi, «Ózstandart» agentliginiń muwapıqlıq sertifikatı hám Rossiya Federaciyasınıń «RosPatent» agentliginiń patent berildi.

Házirgi waqıtta tábiyǵıy gazdı filtrlewshi bul qurılma Tórtkúl rayonında gaz zapasınan nátiyjeli hám hár tárepleme únemli paydalanıwǵa xızmet etip kelmekte.

M.PIRNAZAROVA,

Qaraqalpaqstan xabar agentliginiń xabarshısı