2018-jılda Qanlıkól rayonın kompleksli túrde social-ekonomikalıq rawajlandırıw, xalıqtıń turmıs jaǵdayın hám sociallıq qorǵalıwın jaqsılaw, isbilermenlikti rawajlandırıw hám huqıqbuzarlıqlar profilaktikası boyınsha jumıslardı shólkemlestiriwge qaratılǵan, jámi 85 mlrd. sum átirapındaǵı 195 bántten ibarat «Jol kartası» islep shıǵıldı.
Rayon hákimligi májilisler zalında 2018-jılı 22-fevral kúni Ózbekstan Respublikası Oliy Majlis Nızamshılıq palatası deputatları hám Senat aǵzaları, Ózbekstan Respublikası Ministrler Kabineti wákilleri, Qaraqalpaqstan Respublikası Joqarǵı Keńesi deputatları qatnasında ótkerilgen Xalıq deputatlarınıń Qanlıkól rayonlıq Keńesiniń 40-sessiyasında usı másele kórip shıǵıldı.
Atap ótilgenindey, usı jıldıń 16-22-fevral kúnleri aralıǵında Ózbekstan Respublikası Oliy Majlis Nızamshılıq palatası deputatları, senatorlar, Ministrler Kabineti, ministrlikler wákillerinen ibarat jumısshı topar Qanlıkól rayonın social-ekonomikalıq rawajlandırıw, ekonomika tarmaqları hám sociallıq tarawlardıń jaǵdayın úyrengen.
Usı úyreniw nátiyjeleri boyınsha Ózbekstan Respublikası Oliy Majlis Nızamshılıq palatası deputatı J.Abdijamilov hám basqa da rásmiy wákiller shıǵıp sóylep, úyreniw dáwirinde rayon aymaǵında ámelge asırılǵan jumıslar menen birge isleniwi tiyis wazıypalarǵa toqtap ótti.
Sessiyada Ózbekstan Respublikası Prezidentiniń 2017-jıl 8-avgusttaǵı «Aymaqlardıń jedel social-ekonomikalıq rawajlanıwın támiyinlewge baylanıslı ilajlar haqqında»ǵı qararı tapsırmaları tiykarında rayonda sanaat, qurılıs, transport, baylanıs, awıl xojalıǵı, menshiklestiriw, sawda hám sırtqı ekonomikalıq baylanıslar, isbilermenlik hám miynet bazarı, sociallıq tarawlardıń rawajlanıwı nátiyjesinde byudjet parametrleriniń turaqlı mikroekonomikalıq kórsetkishleriniń sezilerli dárejede óskenligi atap ótildi.
Sessiya dawamında deputatlar hám senatorlar tárepinen úyreniw dáwirinde anıqlanǵan mashqalalar jáne ámelge asırılıwı zárúr ilajlar boyınsha bildirilgen pikir-usınıslar tiykarında tiyisli qararlar qabıl etildi.
Sessiya májilisine Qaraqalpaqstan Respublikası Joqarǵı Keńesiniń komitet baslıǵı S.T.Turmanov qatnastı.
Qaraqalpaqstan xabar agentligi