Prezident Shavkat Mirziyoevtiń ótken jılı dekabr ayındaǵı Qaraqalpaqstanǵa xızmet saparınan soń aymaqta isbilermenlik ortalıǵın jaratıw hám kishi biznesti qollap-quwatlaw maqsetinde 100 milliard sumlıq kepillikli kreditler ajıratılmaqta. Nókis hám Qanlıkól rayonlarında salı maydanlarında balıq jetistiriw texnologiyası engiziledi.
20-fevral kúni Kegeyli rayonında ÓzLiDePtiń Qaraqalpaqstan Respublikalıq Keńesi tárepinen ótkerilgen “Ózbekstannıń belsendi isbilermenleri” atamasındaǵı seminarda usı hám isbilermenlikti rawajlandırıwǵa baylanıslı basqa da maǵlıwmatlar berildi.
Seminarda atap ótiliwinshe, Prezidentimizdiń ótken jılı 15-16 dekabr kúnleri Qaraqalpaqstan Respublikasına bolǵan xızmet saparı aymaqtı sociallıq, ekonomikalıq rawajlandırıw, xalıqtıń párawan turmısın támiyinlew, puqaralardıń jasaw sharayatın jaqsılaw, sonday-aq, isbilermenlik subektleri ushın qolay biznes ortalıǵın jaratıw baǵdarındaǵı jumıslardı jáne de jedellestirdi.
Prezidentimizdiń «Paxtanı payda berse de, payda bermese de egiw waqtı ótti» degen pikiri tiykarında paxta egis maydanların optimizaciyalaw máseleleri kórilmekte. Paxtanıń ornına kóp zúrát beriwshi, eksportta ótimli ónimlerdi egiw boyınsha jumıslar alıp barılmaqta.
Máselen, Shımbay rayonında jumıs baslaǵan «Lanextrakt» qospa kárxanası boyannan ekstrakt islep shıǵarıwdı jolǵa qoymaqta. Kárxana jılına 30 mıń tonna boyan tamırın qayta islep, 1,3 tonna ekstrakt islep shıǵaradı. Kárxanada 200 adam jumıs penen támiyinlengen. Shomanay rayonında da 4 eksportyor kárxana Qıtay, Germaniya, Nigeriya, Hindstan, Angliya, Tayland hám Myanma mámleketlerine boyan tamırın eksport etpekte.
Mámleketimiz basshısınıń 2017-jıl 3-maydaǵı “Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Bwstonliq-farm” hám “Parkent-farm” erkin ekonomikalıq zonaların shólkemlestiriw haqqında”ǵı Pármanınıń orınlanıwı boyınsha da keń kólemli jumıslar ámelge asırılmaqta.
Aymaqta farmacevtika sanaatın 2018-2019 jıllarda rawajlandırıw maqsetinde 27 million dollarǵa teń 37 túrdegi farmacevtika ónimlerin islep shıǵarıwshı 17 joybar ámelge asırılıwı rejelestirilgen.
Nókis qalasında «Nókis Med-Tex» JShJ tárepinen medicina buyımların, «Berlin farm» JShJ tárepinen onkologigiyalıq dári ónimlerin islep shıǵarıw jolǵa qoyıladı. Tórtkúl rayonında «Tórtkúl shiyshe ıdısları» JShJde farmacevtikalıq shiyshe ıdısları tayarlanadı.
Qaraqalpaqstanlı fermerler ushın da qolaylı biznes júrgiziw ushın jańa imkaniyat esikleri ashılmaqta. Atap aytqanda, awıl xojalıǵı ónimlerin saqlaw, qayta islew hám eksport etiw menen shuǵıllanıwshı «Xojeli agrosanoat orayı» JShJde usı jılı 5 mıń tonna miywe-palız ónimlerin qayta islenedi hám qadaqlanadı hám 150 puqara jańa jumıs orınlarına iye boladı.
Qaraqalpaqstanda azıq-awqat sanaatı tarawında ámelge asırılatuǵın investiciyalıq joybarlar, sharwashılıq, qusshılıq, pal hárreshiligi hám balıqshılıqtı rawajlandırıw boyınsha baslı wazıypalar belgilep alındı. 2018-2019 jıllarda miywe-ovosh ónimleri hám góshti qayta islew, muzlatqıshlar qurıw boyınsha 70 joybar ámelge asırılıwı rejelestirilgen. 2018-2020 jıllarda sharwashılıq hám qusshılıqtı rawajlandırıw baǵdarlaması boyınsha 250 joybardı turmısqa engiziw kózde tutılǵan. Nátiyjede 730 dan artıq jańa jumıs orınları jaratıladı.
2018-2020 jıllarda balıqshılıqtı rawajlandırıw baǵdarlaması boyınsha 6 joybar orınlanadı. Nókis hám Qanlıkól rayonlarında salı maydanlarında balıq jetistiriw texnologiyası engiziledi.
Ózbekistan Respublikası Ministrler Kabinetiniń «Respublikada shet el tájriybesi tiykarında ashshı burısh jetistiriwdi kóbeytiw ilajları haqqında»ǵı qararına muwapıq Qaraqalpaqstan Respublikasında fermer, diyqan xojalıqları hám úy qaptalı qıytaq jer uchastkalarına 15 mıń gektar egin maydanǵa ashshı burısh egiw rejelestirilgen.
Respublikamızdıń barlıq isbilermenleri hám fermerleri ushın mámleketimiz barlıq imkaniyatlardı jarattı, tek ǵana olar eksportqa say ónimlerdi tayarlaw kerek hám xalıqqa kerekli ónimler jetkerip beriw arqalı elimiz párawanlıǵın hámde abadanshılıǵın támiyinlewi lazım.
Qaraqalpaqstan xabar agentligi