Poytaxtimizda Oʻzbekiston Xotin-qizlar qoʻmitasi hamkor tashkilotlar bilan birgalikda BMTning “Xotin-qizlar huquqlari kamsitilishining barcha shakllariga barham berish toʻgʻrisida“gi konvensiyasi ijrosiga bagʻishlangan davra suhbati tashkil etdi.

Unda tegishli vazirlik, idoralar, xotin-qizlar jamoat tuzilmalari mutasaddilari va xalqaro tashkilotlardan vakillar ishtirok etdi.

Oʻzbekiston Xotin-qizlar qoʻmitasi raisi oʻrinbosari G.Maʼrufova, Buyuk Britaniya va Shimoliy Irlandiya Birlashgan Qirolligining mamlakatimizdagi Favqulodda va muxtor elchisi K.Allan, BMT Taraqqiyot dasturining Oʻzbekistondagi doimiy vakili oʻrinbosari F.Karaxanov, BMT Aholishunoslik jamgʻarmasining mamlakatimizdagi vakili oʻrinbosari K.Inomxoʻjayev, Fuqarolik tashabbuslarini qoʻllab-quvvatlash markazi direktori D.Qobulova va boshqalar Oʻzbekistonda xotin-qizlar huquqlarini himoya qilish borasida yaratilgan milliy qonunchilik xalqaro meʼyoriy hujjatlarga uygʻun ekanini taʼkidladi.

Inson huquqlari boʻyicha umumjahon deklaratsiyasi qabul qilinganining 70 yilligi munosabati bilan tashkil etilgan mazkur tadbirda BMTning “Xotin-qizlar huquqlari kamsitilishining barcha shakllariga barham berish toʻgʻrisida“gi konvensiyasi qoidalarini bajarishga oid ishlar sarhisobi atroflicha muhokama qilindi.

Yurtimizda xotin-qizlar qoʻmitalari faoliyatini davr ruhiga monand takomillashtirish, oilalarni mustahkamlash, gender tenglikni taʼminlash masalalari davlatimizning doimiy eʼtiborida boʻlib kelmoqda. Oʻtgan ikki yil Oʻzbekiston Xotin-qizlar qoʻmitasi faoliyatida ham tub ijobiy burilish davri boʻldi, deyish mumkin. Mahallalardan boshlab barcha tuzilmalarda vertikal tarzda xotin-qizlar bilan ishlashga oid amaliy chora-tadbirlar davr ruhiga mos tarzda olib borilmoqda.