Усы жыл 4-апрель күни пайтахтымыздағы Арқа-батыс әскерий округиниң  әскерий бөлиминде «Бүркит» әскерий спорт жарысының Қарақалпақстан Республикалық басқышы өткерилди.

Жарыс ҳәр жылы дәстүрий тәризде Өзбекстан Жаслар аўқамы Қарақалпақстан Республикалық Кеңеси тәрепинен өткерилип келинбекте. Оған республикамыздағы орта арнаўлы билимлендириў мәкемелериниң оқыўшы-жаслары қатнасты.

Жарыстың сайлап алыў басқышы усы жылдың февраль айында, қалалық ҳәм районлық басқышлары март айында өткерилди.

Бул басқышларда жеңимпаз болған Әмиўдәрья районындағы «Дүрмен» кәсип-өнер колледжиниң «Лашын» командасы, Қоңырат районындағы медицина колледжиниң «Пасбанлар» командасы, Шымбай районындағы Қурылыс ҳәм сервис кәсип-өнер колледжиниң «Бүркитлер» командасы, Қарақалпақ мәмлекетлик университети жанындағы академиялық лицейдиң «Жаўынгер» командасы финал басқышына жетип келип, олар 9  шәрт бойынша өз-ара күш сынасты.

Жарыс жуўмағында Қарақалпақ мәмлекетлик университети жанындағы академиялық лицейдиң «Жаўынгер» командасы биринши, Қоңырат районындағы медицина колледжиниң «Пасбанлар» командасы екинши, Әмиўдәрья районындағы «Дүрмен» кәсип-өнер колледжиниң «Лашын» командасы ҳәм Шымбай райондағы Қурылыс ҳәм сервис кәсип-өнер колледжиниң «Бүркитлер» командасы үшинши орынды ийеледи.

Жарыс жеңимпазлары шөлкемлемлестириўшилер тәрепинен таярланған диплом ҳәм естелик саўғалары менен сыйлықланды.

Т.СЕЙТНАЗАРОВА,

Қарақалпақстан хабар агентлигиниң шолыўшысы