Орайлық Азия халықаралық институтында (ОАХИ) “Орайлық Азия ҳәм Арқа мәмлекетлери: жаңа бирге ислесиў перспективасы” атамасында дөгерек сәўбети болып өтти. Илаж Финляндия Республикасы Президенти Александр Стуббтың мәмлекетимизге рәсмий сапары шеңберинде шөлкемлестирилди. Илажға Финляндия делегациясы сыпатында Президент Александр Стубб, Парламент депутаты, Өзбекстан менен дослық топарының баслығы Вилле Скиннари, Мартти Ахтисаари Тынышлық Фонды бағдарламалары бойынша басшысы Оскар Эронен ҳәм Мәмлекет басшысы администрациясының Тынышлық бойынша дәлдалшылық директоры Вилле Бруммер қатнасты.

Өзбекстан тәрепинен болса мәмлекеттиң жетекши мәмлекетлик ҳәм мәмлекетлик емес таллаў орайларының басшылары ҳәм ўәкиллери қатнасты.

Әнжуман шеңберинде Орайлық Азияда регионаллық бирге ислесиўдиң тийкарғы мәселелери бойынша пикир алысылды. Сондай-ақ, Арқа кеңес мәмлекетлери ҳәм Орайлық Азия мәмлекетлери арасындағы бирге ислесиўдиң жаңа перспективалы бағдарлары, соның ишинде, саўда ҳәм инвестиция, энергетика, билимлендириў, илим ҳәм инновация тараўларындағы имканиятлар додаланды. Турақлы раўажланыў ҳәм санлы трансформация тараўларында арқан тәжирийбесинен пайдаланыў мәселесине айрықша итибар қаратылды.

ОАХИ директоры Жавлон Ваҳобов Хельсинки көп жыллық халықаралық дәлдалшылық ҳәм нызам үстинлиги орайы сыпатында тән алынғанын атап өтти. Қалаберди, Финляндияның тынышлық орнатыў бағдарындағы садықлығы Орайлық Азия ушын айрықша әҳмийетли екени, әсиресе, инновация ҳәм билимлендириў тараўында дүньяның жетекши мәмлекетлеринен бири екени атап өтилди.

Технологиялық жақтан ең раўажланған мәмлекетлер қатарында тән алынатуғын бул мәмлекеттиң алдынғы тәжирийбесин өзлестириў бойынша Орайлық Азия үлкен потенциалға ийе.

– Мәселен, регион мәмлекетлери ушын “жасыл” энергетика ҳәм тәбийғый ресурслардан ақылға уғрас пайдаланыў тийкарғы бағдарлар болып есапланады, – дейди Ж.Ваҳобов. – Фин мәмлекетиниң бул тараўлардағы тәжирийбеси әмелий әҳмийетке ийе.

Улыўма, бул дөгерек сәўбети тәреплер арасындағы шерикликти беккемлеў жолында әҳмийетли қәдем сыпатында “Орайлық Азия – Арқа кеңес” форматы шеңбериндеги әмелий басламаларды муўапықластырыў ушын әҳмийетли майданға айланды.

Илаж шеңберинде Орайлық Азия халықаралық институты ҳәм Мартти Ахтисаари Тынышлық қоры арасында өз-ара бирге ислесиў ҳаққындағы меморандумға қол қойылды. Бул ҳүжжет сиясат, экономика ҳәм регионаллық қәўипсизлик тараўларында биргеликтеги изертлеўлер өткериў, өз-ара сапарлар әмелге асырыў ҳәм турақлы байланысларды жолға қойыў, сондай-ақ, өз-ара қызығыўшылық оятатуғын басқа да мәселелер бойынша биргеликтеги илажларды шөлкемлестириўди нәзерде тутады.

Хельсинки қаласында жайласқан, Финляндияның бурынғы президенти Мартти Ахтисаари тәрепинен шөлкемлестирилген мәмлекеттиң бул жетекши таллаў орайы 2000-жыл тынышлық бағдары бойынша Нобель сыйлығын алған. Жәмәәт тынышлық орнатыў, келиспеўшиликлерди шешиў ҳәм дүньяның түрли регионларында турақлы тынышлықты тәмийинлеў жолында жумыс алып барады.

Азиза АЛИМОВА, ӨзАның хабаршылары