Oraylıq Aziya xalıqaralıq institutında (OAXI) “Oraylıq Aziya hám Arqa mámleketleri: jańa birge islesiw perspektivası” atamasında dógerek sáwbeti bolıp ótti. Ilaj Finlyandiya Respublikası Prezidenti Aleksandr Stubbtıń mámleketimizge rásmiy saparı sheńberinde shólkemlestirildi. Ilajǵa Finlyandiya delegaciyası sıpatında Prezident Aleksandr Stubb, Parlament deputatı, Ózbekstan menen doslıq toparınıń baslıǵı Ville Skinnari, Martti Axtisaari Tınıshlıq Fondı baǵdarlamaları boyınsha basshısı Oskar Eronen hám Mámleket basshısı administraciyasınıń Tınıshlıq boyınsha dáldalshılıq direktorı Ville Brummer qatnastı.

Ózbekstan tárepinen bolsa mámlekettiń jetekshi mámleketlik hám mámleketlik emes tallaw oraylarınıń basshıları hám wákilleri qatnastı.
Ánjuman sheńberinde Oraylıq Aziyada regionallıq birge islesiwdiń tiykarǵı máseleleri boyınsha pikir alısıldı. Sonday-aq, Arqa keńes mámleketleri hám Oraylıq Aziya mámleketleri arasındaǵı birge islesiwdiń jańa perspektivalı baǵdarları, sonıń ishinde, sawda hám investiciya, energetika, bilimlendiriw, ilim hám innovaciya tarawlarındaǵı imkaniyatlar dodalandı. Turaqlı rawajlanıw hám sanlı transformaciya tarawlarında arqan tájiriybesinen paydalanıw máselesine ayrıqsha itibar qaratıldı.
OAXI direktorı Javlon Vahobov Xelsinki kóp jıllıq xalıqaralıq dáldalshılıq hám nızam ústinligi orayı sıpatında tán alınǵanın atap ótti. Qalaberdi, Finlyandiyanıń tınıshlıq ornatıw baǵdarındaǵı sadıqlıǵı Oraylıq Aziya ushın ayrıqsha áhmiyetli ekeni, ásirese, innovaciya hám bilimlendiriw tarawında dúnyanıń jetekshi mámleketlerinen biri ekeni atap ótildi.
Texnologiyalıq jaqtan eń rawajlanǵan mámleketler qatarında tán alınatuǵın bul mámlekettiń aldınǵı tájiriybesin ózlestiriw boyınsha Oraylıq Aziya úlken potencialǵa iye.
– Máselen, region mámleketleri ushın “jasıl” energetika hám tábiyǵıy resurslardan aqılǵa uǵras paydalanıw tiykarǵı baǵdarlar bolıp esaplanadı, – deydi J.Vahobov. – Fin mámleketiniń bul tarawlardaǵı tájiriybesi ámeliy áhmiyetke iye.
Ulıwma, bul dógerek sáwbeti tárepler arasındaǵı sheriklikti bekkemlew jolında áhmiyetli qádem sıpatında “Oraylıq Aziya – Arqa keńes” formatı sheńberindegi ámeliy baslamalardı muwapıqlastırıw ushın áhmiyetli maydanǵa aylandı.
Ilaj sheńberinde Oraylıq Aziya xalıqaralıq institutı hám Martti Axtisaari Tınıshlıq qorı arasında óz-ara birge islesiw haqqındaǵı memorandumǵa qol qoyıldı. Bul hújjet siyasat, ekonomika hám regionallıq qáwipsizlik tarawlarında birgeliktegi izertlewler ótkeriw, óz-ara saparlar ámelge asırıw hám turaqlı baylanıslardı jolǵa qoyıw, sonday-aq, óz-ara qızıǵıwshılıq oyatatuǵın basqa da máseleler boyınsha birgeliktegi ilajlardı shólkemlestiriwdi názerde tutadı.
Xelsinki qalasında jaylasqan, Finlyandiyanıń burınǵı prezidenti Martti Axtisaari tárepinen shólkemlestirilgen mámlekettiń bul jetekshi tallaw orayı 2000-jıl tınıshlıq baǵdarı boyınsha Nobel sıylıǵın alǵan. Jámáát tınıshlıq ornatıw, kelispewshiliklerdi sheshiw hám dúnyanıń túrli regionlarında turaqlı tınıshlıqtı támiyinlew jolında jumıs alıp baradı.

Aziza ALIMOVA, ÓzAnıń xabarshıları