Қытайда мәмлекеттиң ең ири сиясий илажы – Халық ўәкиллери жыйыны (NPC) ҳәм Сиясий мәсләҳәт кеңеси (CPPCC)  мәжилиси жуўмақланды. “Еки сессия” деп аталған бул әнжуман мәмлекеттиң экономикалық ҳәм сиясий тийкарғы бағдарларын белгилеп бериўи менен әҳмийетли.

Мәжилисте Пекин экономикалық турақлылықты сақлаў, глобаллық бәсекиде үстинликти тәмийинлеў ушын технология ҳәм инновацияға айрықша әҳмийет берип атырғаны мәлим етилди. Атап айтқанда, жасалма интеллект, робот техникасы, ярым өткизгишлер, биология технологиясы, квант есаплаў ҳәм 6G сыяқлы бағдарларға инвестицияны кескин арттырыў режелестирилмекте. Илимий-изертлеў қәрежети шама менен 7 процентке көбейеди.

Соның менен бирге, мәмлекет басшылығы экономикалық өсиўдиң жаңа басқышын тәмийинлеў ушын ишки тутыныўды хошаметлеў зәрүр екенлигин тән алмақта. Жалпы ишки өнимди өсириў ушын 4,5-5 процентлик мақсет белгиленген. Бул соңғы он жыллықлардағы ең төмен көрсеткиш.

Ҳүкимет балалар тәрбиясын жақсылаў, кекселерге ғамхорлық хызметин тереңлестириў, мийнет дем алысын кепиллеў ҳәм социаллық қорғаўды күшейтиў арқалы халыққа қәрежетти көбейтиўге үмит етпекте. Соның менен бирге, инфраструктура ҳәм санаат жойбарлары ушын мәмлекет қарызын арттырыў имканияты да қызғын додаланды.

Экспертлердиң пикиринше, турақ жай базарының кризиси, жаслардың жумыссызлығы ҳәм халықтың қаржыны үнемлеўге бейимлиги себепли ишки тутыныўды хошаметлеў аңсат болмайды. Сол себепли Қытай экономикасының келешектеги өсиўи технология ҳәм инновация менен бирге халықтың сатып алыў қәбилети қаншелли артыўына да байланыслы болып қалмақта.

Мусулмон Зиё, ӨзА