Qıtayda mámlekettiń eń iri siyasiy ilajı – Xalıq wákilleri jıyını (NPC) hám Siyasiy másláhát keńesi (CPPCC) májilisi juwmaqlandı. “Eki sessiya” dep atalǵan bul ánjuman mámlekettiń ekonomikalıq hám siyasiy tiykarǵı baǵdarların belgilep beriwi menen áhmiyetli.
Májiliste Pekin ekonomikalıq turaqlılıqtı saqlaw, globallıq básekide ústinlikti támiyinlew ushın texnologiya hám innovaciyaǵa ayrıqsha áhmiyet berip atırǵanı málim etildi. Atap aytqanda, jasalma intellekt, robot texnikası, yarım ótkizgishler, biologiya texnologiyası, kvant esaplaw hám 6G sıyaqlı baǵdarlarǵa investiciyanı keskin arttırıw rejelestirilmekte. Ilimiy-izertlew qárejeti shama menen 7 procentke kóbeyedi.
Sonıń menen birge, mámleket basshılıǵı ekonomikalıq ósiwdiń jańa basqıshın támiyinlew ushın ishki tutınıwdı xoshametlew zárúr ekenligin tán almaqta. Jalpı ishki ónimdi ósiriw ushın 4,5-5 procentlik maqset belgilengen. Bul sońǵı on jıllıqlardaǵı eń tómen kórsetkish.
Húkimet balalar tárbiyasın jaqsılaw, kekselerge ǵamxorlıq xızmetin tereńlestiriw, miynet dem alısın kepillew hám sociallıq qorǵawdı kúsheytiw arqalı xalıqqa qárejetti kóbeytiwge úmit etpekte. Sonıń menen birge, infrastruktura hám sanaat joybarları ushın mámleket qarızın arttırıw imkaniyatı da qızǵın dodalandı.
Ekspertlerdiń pikirinshe, turaq jay bazarınıń krizisi, jaslardıń jumıssızlıǵı hám xalıqtıń qarjını únemlewge beyimligi sebepli ishki tutınıwdı xoshametlew ańsat bolmaydı. Sol sebepli Qıtay ekonomikasınıń keleshektegi ósiwi texnologiya hám innovaciya menen birge xalıqtıń satıp alıw qábileti qanshelli artıwına da baylanıslı bolıp qalmaqta.
Musulmon Ziyo, ÓzA