Таў-кән ҳәм геология тараўында жаңа шериклик байланысларын беккемлеў және инвестиция ҳәм технология алмасыўын хошаметлеў бүгинги күнде тийкарғы ўазыйпаға айланбақта. Әсиресе, тәбийғый ресурсларды нәтийжели өзлестириў, илимий-техникалық тәжирийбе алмасыў ҳәм биргеликтеги жойбарларды әмелге асырыў бағдарындағы сөйлесиўлер мәмлекетлер арасындағы экономикалық бирге ислесиўди жаңа басқышқа алып шықпақта.

Усы күнлерде Таў-кән санааты ҳәм геология министрлиги делегациясы ўәкиллериниң Парагвай Республикасына еткен хызмет сапары да бул бағдардағы байланысларды және де беккемлеўге қаратылған.

Асунсьон қаласында Өзбекстан делегациясы Парагвай Республикасы Жәмийетлик ислер ҳәм коммуникациялар министрлигиниң минерал ресурслар ҳәм энергетика бойынша вице-министри Маурисио Бежарано менен ушырасыў өткерди.

Сөйлесиў даўамында Өзбекстан ҳәм Парагвай Президентлериниң ушырасыўында ерисилген келисимлерге тийкарланып кән-геология тараўындағы перспективалы бағдарларда әмелий жумысларды баслаў, тараўда илимий-техникалық бирге ислесиўди жолға қойыў ҳәм өз-ара тәжирийбе алмасыў процесслерин жеделлестириў мәселелери ҳәр тәреплеме додаланды.

Атап өтилгениндей, еки мәмлекет арасындағы кән-геология бирге ислесиўи тек ғана экономикалық ҳәм технологиялық тараўларда емес, ал еки мәмлекет арасындағы стратегиялық шерикликти беккемлеўде де үлкен әҳмийетке ийе. Бул бирге ислесиўдиң раўажланыўы, әлбетте, жаңа биргеликтеги жойбарлар ҳәм инвестициялық имканиятларды жаратыўға хызмет етеди.

Ушырасыў жуўмағында тәреплер бирге ислесиўди беккемлеўге қаратылған бир қатар ҳүжжетлерге қысқа мүддетлерде белгиленген тәртипте қол қойыў бойынша келисимге еристи.

Министрлик мәлимлеме хызметиниң хабар бериўинше, делегацияның хызмет сапары даўам етпекте.

Н.Зиёдуллаева, ӨзА