Taw-kán hám geologiya tarawında jańa sheriklik baylanısların bekkemlew jáne investiciya hám texnologiya almasıwın xoshametlew búgingi kúnde tiykarǵı wazıypaǵa aylanbaqta. Ásirese, tábiyǵıy resurslardı nátiyjeli ózlestiriw, ilimiy-texnikalıq tájiriybe almasıw hám birgeliktegi joybarlardı ámelge asırıw baǵdarındaǵı sóylesiwler mámleketler arasındaǵı ekonomikalıq birge islesiwdi jańa basqıshqa alıp shıqpaqta.
Usı kúnlerde Taw-kán sanaatı hám geologiya ministrligi delegaciyası wákilleriniń Paragvay Respublikasına etken xızmet saparı da bul baǵdardaǵı baylanıslardı jáne de bekkemlewge qaratılǵan.
Asunson qalasında Ózbekstan delegaciyası Paragvay Respublikası Jámiyetlik isler hám kommunikaciyalar ministrliginiń mineral resurslar hám energetika boyınsha vice-ministri Maurisio Bejarano menen ushırasıw ótkerdi.
Sóylesiw dawamında Ózbekstan hám Paragvay Prezidentleriniń ushırasıwında erisilgen kelisimlerge tiykarlanıp kán-geologiya tarawındaǵı perspektivalı baǵdarlarda ámeliy jumıslardı baslaw, tarawda ilimiy-texnikalıq birge islesiwdi jolǵa qoyıw hám óz-ara tájiriybe almasıw processlerin jedellestiriw máseleleri hár tárepleme dodalandı.
Atap ótilgenindey, eki mámleket arasındaǵı kán-geologiya birge islesiwi tek ǵana ekonomikalıq hám texnologiyalıq tarawlarda emes, al eki mámleket arasındaǵı strategiyalıq sheriklikti bekkemlewde de úlken áhmiyetke iye. Bul birge islesiwdiń rawajlanıwı, álbette, jańa birgeliktegi joybarlar hám investiciyalıq imkaniyatlardı jaratıwǵa xızmet etedi.
Ushırasıw juwmaǵında tárepler birge islesiwdi bekkemlewge qaratılǵan bir qatar hújjetlerge qısqa múddetlerde belgilengen tártipte qol qoyıw boyınsha kelisimge eristi.
Ministrlik málimleme xızmetiniń xabar beriwinshe, delegaciyanıń xızmet saparı dawam etpekte.

N.Ziyodullaeva, ÓzA