Нефть-газ тармағында халықаралық бирге ислесиўди кеңейтиў, өндирис процесслерин модернизациялаў ҳәм алдынғы технологиялық шешимлерди енгизиўге қаратылған жумыслар избе-из даўам етпекте. Бул процессте “Өзбекнефтьгаз” АЖ ҳәм “SOCAR” компаниясы арасындағы өз-ара сөйлесиў ҳәм әмелий бирге ислесиў айрықша әҳмийетке ийе.

Усы жумыслар шеңберинде жәмийет басшылығы “SOCAR” компаниясының тармақлық структуралары – “SOCAR Trading”  ҳәм “SOCAR Downstream Management” ўәкиллери менен ушырасыў өткерди.

Сөйлесиў даўамында еки мәмлекет арасындағы стратегиялық шерикликтиң беккемленип атырғаны, оның жоқары дәрежеде қоллап-қуўатланып атырғаны айрықша атап өтилди. Атап айтқанда, еки мәмлекет басшылары Шавкат Мирзиёев ҳәм Илҳам Алиевтиң басшылығындағы сиясий сөйлесиў экономикалық байланыслар, соның ишинде, нефть-газ тараўындағы бирге ислесиўди және де жеделлестириўге хызмет етип атырғаны атап өтилди.

Ушырасыў ўақтында “SOCAR”  ўәкиллери “Өзбекнефтьгаз” АЖ менен биргеликте Бухара нефтьти қайта ислеў заводының жумыс нәтийжелилигин арттырыў, өндиристи оптималластырыў ҳәм заманагөй операциялық технологияларды енгизиў бағдарларында бирге ислесиўди кеңейтиўге таяр екенлигин билдирди. Сондай-ақ, санлы басқарыў шешимлерин енгизиў, технологиялық процесслерди жетилистириў ҳәм энергия нәтийжелилигин арттырыўға қаратылған бир қатар усыныслар додаланды.

Жәмийет мәлимлеме хызметиниң хабарына бола, ушырасыў соңында тәреплер әмелий бирге ислесиўди избе-из даўам еттириў, биргеликтеги басламаларды басқышпа-басқыш әмелге асырыў ҳәм перспективалы жойбарларды биргеликте ислеп шығыў бойынша келисимге еристи. Соның менен бирге, техникалық аудит өткериў ҳәм оның нәтийжелери бойынша кейинги қәдемлерди белгилеў мақсетинде Әзербайжан тәрепи жумысшы топарының кәрханаға сапарын шөлкемлестириўге келисип алынды.

Н.Зиёдуллаева, ӨзА